Тошкентда мингдан ортиқ одамни чув туширган шахс ушланди

Наманган вилоятида яшовчи йигит Telegram тармоғида гуруҳ очиб, пулини қисқа фурсатда кўпайтириб беришини айтган ҳолда одамларни алдаб келган. У изини йўқотиш учун турли вилоятларда яшовчи одамлар номига олинган SIM карталардан фойдаланган.

Ўзини Муҳаммад деб таништириб, кўплаб одамларни алдаган ҳолда уларнинг пулини ўзлаштириб олган йигит Тошкентда қўлга олинди. Бу ҳақда ИИВ ТҚД Киберхавфсизлик маркази хабар берди.

Маълум қилинишича, Наманган вилоятида яшовчи шахс одамларга пулини қисқа фурсатда кўпайтириб беришини айтиб, ижтимоий тармоқлар орқали уларни алдаб келган. Унинг ёлғонига мингдан ортиқ одам алданган.

Йигит ўз изини йўқотиш мақсадида турли вилоятларда яшовчи одамлар номига олинган телефон ва SIM карталар, шунингдек, банк карталаридан фойдаланиб келган. Ўғирлаган пулларини эса ўз манфаати йўлида ишлатиб юборган.

Унинг алдовига ишонганлар орасида навоийлик шахс ҳам бор. У 7 млн сўм пулини ўз қўли билан киберўғрига топширган. Алданганини билгач эса Ички ишлар бошқармасига мурожаат қилган.

Сохта трейдер Навоий вилояти Ички ишлар ходимлари томонидан ўтказилган тезкор тадбирда Тошкент шаҳрида ушланган. Унга нисбатан Жиноят кодексининг 169-моддаси (ўғрилик) 3-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Олдинроқ Хоразмда ҳам пулини кўпайтириб беришни айтиб, мингдан ортиқ одамни чув туширган шахс ушланганди.