ЕИ суди Малтадан «олтин паспортлар» беришни тўхтатишни талаб қилди

Малта «инвестиция эвазига фуқаролик» схемасидан воз кечиши керак, акс ҳолда у жаримага тортилади.

Фото: Getty images

Евроиттифоқ суди Малтанинг «олтин паспортлар» бериш тартиби ЕИ қонунчилигини бузаётгани тўғрисида қарор чиқарди, деб хабар беради Financial Times.

«Европа Иттифоқига аъзо давлат ўз фуқаролигини, том маънода Европа фуқаролигини олдиндан белгиланган тўлов ёки инвестиция эвазига тақдим эта олмайди, чунки бу фуқароликни олишни оддий тижорат битимига айлантириш билан тенг», — дейилади суд қарорида.

Суд версиясига кўра, Малта шу орқали ЕИ шартномасида белгиланган «ўз мажбуриятларини бажармаяпти».

FT’нинг ёзишича, Малта «инвестиция эвазига фуқаролик» схемасидан воз кечиши керак, акс ҳолда у жаримага тортилади. Малта ҳукумати «ушбу қарорнинг ҳуқуқий оқибатлари ўрганиб чиқилаётгани, фуқаролик бўйича норматив база қарорда келтирилган тамойилларга мос ҳолатга келтирилишини» маълум қилди.

2023 йилда Еврокомиссия Малтанинг «олтин паспортлар»ни бериш тартиби сабаб ЕИ Олий судига мурожаат қилганди. ЕКга кўра, Малта схемаси бутун иттифоқ учун салбий оқибатларни келтириб чиқариши мумкин, чунки Малта фуқаролигини олганлар ЕИнинг исталган мамлакатида яшаши ва ишлаши, Европа сайловларида овоз бериши мумкин.

Аввалроқ Украинадаги уруш сабаб Ғарб санкцияларига учраган баъзи россиялик бизнесменлар «олтин виза» дастури орқали олинган Малта паспортлари туфайли Европа Иттифоқи давлатларига кириш имкониятини сақлаб қолаётгани тўғрисида хабар берилганди. Улар орасида бизнесмен Алберт Авдолян, шунингдек, АҚШ томонидан «Россия давлат идораларига алоқадор фойдаланувчиларга ускуналарни экспорт қилишга кўмаклашгани учун» айбланган Евгения Бернова ҳамда миллионер Павел Мелников ҳам бор.

#Малта #олтин паспорт