Малта июн ойида Фаластин мустақиллигини тан олади

Бу борадаги баёнот Саудия Арабистони ва Франция томонидан ташкил этиладиган халқаро конференцияда эълон қилинади. Шунингдек, Франция ҳам Фаластин мустақиллигини тан олишни режалаштирмоқда.

Фото: AP

Малта бош вазири Роберт Абела ўз мамлакати тез орада Фаластин мустақиллигини тан олишини маълум қилди, деб ёзмоқда Times of Malta.

Малтада Фаластин элчиси бор, ушбу мамлакат 2024 йилда БМТ Бош ассамблеясининг Фаластин давлатининг ташкилотга тўлақонли аъзолик ҳуқуқини тан олувчи резолюциясини қўллаб-қувватлаган, бироқ ҳозирча Фаластин давлатини расмий равишда тан олганини эълон қилмаган.

Абеланинг сўзларига кўра, тегишли баёнот 20 июн куни БМТ кўмагида Саудия Арабистони ва Франция томонидан ташкил этиладиган халқаро конференцияда эълон қилинади. Малта вакилларининг таъкидлашича, конференцияда ўз мамлакати Фаластинни тан оладиган ягона давлат бўлмайди.

Axios’нинг ёзишича, июн ойида Франция ҳам Фаластин мустақиллигини тан олмоқчи. Франция президенти Эммануэл Макрон 2025 йил апрел ойида France 5 га берган интевюсида «яқин ойларда» шу каби баёнот билан чиқиш режаси борлигини айтганди. ҲАМАС гуруҳи ўшанда Франциянинг Фаластинни тан олиш қарори «муҳим қадамга» айланишини билдирган эди, Исроил ТИВ раҳбари Гидеон Саар эса «сохта давлат»нинг тан олинишини қоралаган ва уни «терроризм учун мукофот» деб атаган.

Маълумот учун, 2024 йилда Норвегия, Ирландия, Испания, Словения ва Арманистон Фаластин мустақиллигини тан олганини эълон қилган эди.

#Фаластин #Малта