Таиландга борадиганлар учун янги талаб жорий этилди

Энди Таиландга борадиган чет элликлар, жумладан, Ўзбекистон фуқаролари ҳам мамлакатга кириш картасини ушбу давлатга етиб бориш санасидан 3 кун олдин олишлари шарт.

Фото: Getty images

Таиланд қироллиги Ташқи ишлар вазирлиги мамлакатга киришнинг янги тартиби жорий этилганини расман маълум қилди. Бу ҳақда Ўзбекистон ТИВ матбуот хизмати хабар берди.

Унга кўра, 2025 йил 1 майдан бошлаб Таиланд қироллигига кирувчи барча чет эл фуқаролари Таиландга кириш картасини (Thailand Digital Arrival Card, TDAC) мамлакатга етиб келиш санасидан 3 кун олдин махсус платформа орқали олишлари шарт.

«Шу муносабат билан Таиландга боришни режалаштирган Ўзбекистон фуқароларида қиролликнинг мазкур қарорини ҳисобга олишларини сўраб қоламиз», — дейилади вазирлик хабарида.

Эслатиб ўтамиз, 2024 йилнинг 15 июл кунидан Таиланд ҳукумати 93 давлат, жумладан, Ўзбекистон фуқаролари учун 60 кунгача визасиз кириш режимини расман жорий қилганди.

#Таиланд