Россия ва АҚШ делегацияси Ар-Риёдда иккинчи учрашувни ўтказади — ОАВ

Ушбу учрашув 18 феврал куни Саудия Арабистони пойтахтида ўтказилган музокараларнинг давоми бўлади. Ҳозирча унда кимлар иштирок этиши маълум эмас.

Фото: AP

Россия ва Америка делегацияси 25 феврал куни Ар-Риёдда иккинчи учрашувни ўтказади. Бу ҳақда Die Zeit нашри дипломатик манбаларига таяниб хабар берди.

Нашр учрашувда кимлар иштирок этишига ойдинлик киритмаган. Таъкидланишича, у 18 феврал куни Саудия Арабистони пойтахтида ўтказилган музокараларнинг давоми бўлади. Ўшанда Россия делегациясида ташқи ишлар вазири Сергей Лавров, Америка делегациясига эса АҚШ давлат котиби Марко Рубио бошчилик қилганди. Бу даражадаги учрашув Россия Украинага бостириб кирганидан бери илк бор ўтказилди. ЕИ ва Украина вакиллари музокараларда иштирок этмади.

Қайд этилишича, 25 феврал куни Ар-Риёдда ўтказиладиган учрашув Франция президенти Эммануэл Макрoннинг АҚШга ташрифидан бир кун ўтиб содир бўлмоқда. Мазкур учрашувдан кейин Трамп ўт очишни тўхтатиш келишувига яқин ҳафталарда эришиш мумкинлигини маълум қилганди.

Аввалроқ Путин миллиардер Абрамовични Украина бўйича музокара ўтказадиганлар гуруҳига киритмагани тўғрисида хабар берилганди. 58 ёшли Абрамович бундан олдин РФнинг Ғарб ва Украина билан алоқаларида «Кремлнинг норасмий вакили» ролини бажарган. У «ғалла битими»нинг тузилиши ва ҳарбий асирлар алмашинувида иштирок этган эди.

#Ар-Риёд #АҚШ