Лувр музейида “Мона Лиза”ни томоша қилиш учун алоҳида чипта сотилади

Да Винчининг машҳур асари келгусида алоҳида хонага кўчирилади, уни кўрмоқчи бўлганлар эса қўшимча чипта сотиб олиши керак бўлади.

Фото: Benoit Tessier / Reuters

Париждаги Лувр музейида Леонардо да Винчининг машҳур “Мона Лиза” асарини кўришни истаганлар учун қўшимча чипта жорий этилади. Бу ҳақда музей директори Лоренс де Карс маълум қилди.

28 январ куни Франция президенти Эммануэл Макрон “Луврнинг янги уйғониш даври” дастурини эълон қилганди. Дастур доирасида музей реставрация қилинади. Ундан аввал де Карс бино қониқарсиз ҳолатга келиб қолгани ҳақида ҳукуматга хат йўллаган.

Макрон реставрация доирасида бир нечта янгиликлар эълон қилди. Хусусан, 2031 йилгача музей учун янги ва катта кириш зали барпо этилади, “Мона Лиза” асари алоҳида хонага кўчирилади ҳамда бу хонага кириш учун алоҳида чипта сотиб олиш керак бўлади. Шунингдек, 2026 йил 1 январдан бошлаб Европа Иттифоқига аъзо бўлмаган мамлакатлардан келган меҳмонлар учун музейга кириш нархлари оширилиши режалаштирилмоқда.

“Ўзгаришлардан бири шуки, кўргазмалар ва доимий коллекцияларга кириш учун битта чипта, ‘Мона Лиза’ни кўриш учун эса қўшимча чипта жорий қилинади”, — деб тушунтирди де Карс.

Ҳозирда Луврга кириш чиптаси нархи 22 евро. 26 ёшгача бўлган Европа Иттифоқи фуқаролари учун кириш бепул. Чипта Луврга ташриф буюрилган кун ва кейинги куни Эжен Делакруа номидаги Миллий музейга ҳам кириш ҳуқуқини беради.

#Париж #Мона Лиза #Лувр музейи