Британия суди Apple компаниясига қарши 1,5 млрд фунтлик даъвони кўриб чиқади

Даъвогарлар компанияни бозордаги мавқеини суиистеъмол қилганликда ва App Store орқали юклаб олинган дастурий таъминот учун истеъмолчиларидан «жуда қиммат ва адолатсиз» тўловларни ундирганликда айбламоқда.

Фото: Tada Images / Shutterstock

13 январ куни Лондоннинг рақобат бўйича апелляция суди миллионлаб британиялик истеъмолчилар номидан Apple компаниясига қарши қўзғатилган ишни кўришни бошлайди, деб хабар берди FT.

Даъво аризасида айтилишича, Apple компанияси iPhone ва iPad учун дастур ишлаб чиқарувчиларни ўз дастурий таъминотини фақат App Store орқали сотишга мажбурлаб, монополия яратган. Компания сотувдан 30 фоизгача устама олади. Харажатлар, даъвогарларнинг айтишича, истеъмолчилар гарданига тушади. Қайд қилинишича, агар дастурий таъминот рақобатчи дўконлар орқали сотилганида устама анча паст бўлар эди.

Apple даъвони «асоссиз» деб ҳисоблайди. Компаниянинг таъкидлашича, устама одатда бошқа иловалар дўконлари оладиган қийматга мос келади.

Ноябр ойида Буюк Британияда Apple компаниясига қарши яна бир суд жараёни бошланди. Даъвогарлар компанияни iCloud булутли хизматига обуна сотиб олишга мажбурлаганликда айбламоқда. Ушбу даъвода талаб қилинган товон 3 миллиард фунт стерлингни ташкил қилади.

#Буюк Британия #Apple #технологиялар