Toshkentda o‘zini IIV mansabdori sifati tanishtirib, pul undirmoqchi bo‘lgan advokat ushlandi

U o‘z sherigi bilan Buxoroda qamoqda o‘tirgan mahkumni Toshkent viloyatidagi JIEMga ko‘chirib berish evaziga 5 ming dollar talab qilgan.

Foto: DXX

DXX Call-markaziga kelib tushgan murojaat asosida Bosh prokuratura huzuridagi Iqtisodiy jinoyatlarga qarshi kurashish departamenti bilan hamkorlikda tezkor tadbir o‘tkazildi.

Ma’lum bo‘lishicha, Toshkent shahrida yashovchi, muqaddam firibgarlik bilan bog‘liq jinoyati uchun sudlangan 45 yoshli fuqaro o‘zining sherigi – poytaxtda faoliyat yurituvchi advokatlik byurosi advokatini go‘yoki Ichki ishlar vazirligi Jazoni ijro etish departamentida yuqori lavozimda ishlovchi shaxs sifatida tanishtirgan.

Shu orqali u 2024 yilda sud hukmi bilan 8 yil 7 oy muddatga ozodlikdan mahrum etilgan, hozirda Buxoro viloyatidagi 1-sonli jazoni ijro etish muassasasida jazo muddatini o‘tayotgan mahkumni Toshkent viloyatidagi 7-sonli JIEMga ko‘chirib berish evaziga arizachidan 5 ming AQSh dollari talab qilgan.

Ushbu so‘ralgan pul mablag‘ini olgan vaqtlarida ashyoviy dalillar bilan ushlanib, ularga nisbatan Jinoyat kodeksining 168 (firibgarlik) va 28, 211-moddalari (pora berish) bilan jinoyat ishi qo‘zg‘atildi hamda qamoq ehtiyot chorasi qo‘llangan.

#advokat #DXX #mahkum