Alisher Qodirov maktabda bolalarga “Katyusha” yodlatilgani holati yuzasidan Maktab vazirligidan izoh so‘radi

Yaqinda 9 may sanasi munosabati bilan poytaxtning Chilonzor tumanidagi 188-maktabda o‘qituvchi dars o‘rniga o‘quvchilarga “Katyusha” yodlatgani xabar qilingandi.

Oliy Majlis Qonunchilik palatasi deputati, Milliy tiklanish siyosiy partiyasi raisi Alisher Qodirov ayni holat yuzasidan Maktabgacha va maktab ta’limi vazirligi izoh berishini so‘radi.

“Bog‘cha va maktablarda bolalarning ongostiga o‘zligimiz xo‘rlangan sovet davriga sog‘inch, ajdodlarimizni qirg‘in qilgan imperialistik ramzlarga muhabbatning singdirilishi milliy tahdid sifatida baholanishi zarur.

O‘zbekistondagi bog‘cha va maktablar farzandlarimizni milliy va umuminsoniy qadriyatlar asosida, o‘zligimizga mehr va sadoqat bilan tarbiyalash uchun kerak, tashqi propaganda targ‘iboti uchun emas”, – deydi u.

Shuningdek, Qodirov Tashqi ishlar vazirligiga “Rossotrudnichestvo” faoliyatini tahlil qilish haqida so‘rov yubormoqchiligini ham aytib o‘tgan.

“Non berib qo‘lidan ayrilgan xalqmiz, yaxshi niyatimiz suiiste’mol qilinishiga yo‘l qo‘yilmasligi kerak”, – deya yakunlagan u Telegram-kanalida yozgan postini.

Eslatib o‘tamiz, 188-maktabdagi holat yuzasidan berilgan rasmiy munosabatda “Katyusha” va “Smuglyanka” qo‘shiqlarini yodlatgani tasdiqlanmagan, rad ham etilmagan. Maktab ma’muriyati o‘qituvchining dars mahalida bunday tadbir o‘tkazishi mumkin emasligi haqida ogohlantirish bergan.

Bundan avvalgi voqeada ayni shu maktabda 6-sinf o‘quvchisi rus tili darsi vaqtida o‘qituvchidan darsni shu tilda olib borishni so‘ragani sabab kaltaklangandi.