Alisher Qodirov ishlab chiqarilganiga 25-30 yildan oshgan mashinalarni iste’moldan chiqarishga chaqirdi

O‘zbekiston prezidenti 9 iyul kungi selektorda yo‘llardagi xavfsizlik bo‘yicha ilgari surgan tashabbuslarga asosan, “Milliy tiklanish” partiyasi qonunlarni o‘zgartirish bo‘yicha maslahatlashuvlarni boshlaydi. Bu haqda partiya raisi Alisher Qodirov ma’lum qildi.

“24 million qoidabuzarlik, shundan 19 milliontasi tezlik bilan bog‘liq. Bu yerda nimadir noto‘g‘ri ishlayapti.

Tezlik uchun cheklov joy, vaqt va zaruratiga qarab belgilanishi kerak. Masalan, magistral yo‘l, masofa uzoq, aholi yashash punkti emas, nega 130 yurish mumkinmas?

Qizilda o‘tish, cheklangan joyda ikki karra tez yurish, avariya xavfi yaratib qasddan tartibsiz harakat… marhamat, ayovsiz jarimani bosish kerak, lekin ayrim jazolar bo‘yicha haydovchilarning ham fikri bilan qiziqish zarur”, – deya yozdi Qodirov Telegram'dagi kanalida.

Uning fikricha, davlat organlarining xizmat avtolariga alohida e’tiborni ta’qiqlash – kechikkan qaror. Tartib hammaga bir bo‘lish kerak, deydi deputat.

“40-50 yillik avtomashinalarni bosqichma-bosqich iste’moldan chiqarish – juda to‘g‘ri taklif. Hatto bu cheklovni 25-30 yilga tushirish ham noto‘g‘ri bo‘lmaydi, deb o‘ylayman. Faqat mashinani almashtirish uchun qulay takliflar bo‘lishi kerak”, – ta’kidlaydi Qodirov.

Partiya rahbari ichki ishlar tizimi xodimlarini tayyorlash bo‘yicha tashabbusni “o‘rinli va og‘riqli muammo” deb atadi. “Bu sohada ishini yaxshi biladigan, o‘qigan, har tomonlama jamiyatga namuna bo‘ladigan qorako‘zlar ishlashi kerak, vazirlikdagi mansabdorning jiyan yoki hamqishloqlari emas. Jamiyat formadagi xodimlar bilan faxrlanishi kerak”, – dedi u.

Qodirovning qayd etishicha, tartib – hayotiy zarurat, u hammaga kerak. Cheklovlar va jazolarsiz esa tartibni ta’minlab bo‘lmaydi.

Qonunlarni o‘zgartirish bo‘yicha maslahatlashuvlarni boshlaymiz, deya qo‘shimcha qildi Alisher Qodirov.