Yaman husiylari Trampni yolg‘onchilikda aybladi

Yaman husiylari siyosiy byurosi a’zosi Zayfulla ash-Shomiy Al-Mayadeen nashri bilan suhbatda AQSh prezidenti Trampning «husiylar taslim bo‘lgani» haqidagi so‘zlarini rad etdi. U Tramp jamoasi bilan rasmiy aloqalari yo‘qligini va AQSh prezidentining o‘zi esa «yolg‘on gapirayotganini» ta’kidladi.

6 may kuni AQSh prezidenti Donald Tramp Yaman husiylari endi jang qilishni istamayotgani, shuning uchun Qo‘shma Shtatlar ularning pozitsiyalariga zarba berishni to‘xtatishini aytdi.

«Husiylar endi jang qilishni xohlamasligini e’lon etishdi yoki hech bo‘lmaganda bizga e’lon qilishdi. Ular shunchaki jang qilishni xohlamayapti. Va biz buni hurmat qilamiz. Va biz bombardimon qilishni to‘xtatamiz, ular taslim bo‘ldi, lekin muhimi, biz ularning so‘zlariga ishonamiz. Ular endi kemalarni portlatib yubormasligini aytdi. Va bu bizning harakatlarimizdagi asosiy maqsad edi», dedi Tramp.

AQSh prezidentining qo‘shimcha qilishicha, Amerika harbiylari husiylar pozitsiyalarini bombardimon qilishni darhol to‘xtatadi.

CNN xabariga ko‘ra, Trampning bayonoti so‘nggi kunlarda AQSh, Ummon va husiylar o‘rtasida diplomatik faollikning kuchayishi ortidan sodir bo‘ldi.

Ummon tashqi ishlar vaziri Badr al-Busaidiy ijtimoiy tarmoqda «kelajakda hech bir tomon Qizil dengiz va Bob al-Mandib bo‘g‘ozida xalqaro tijorat navigatsiyasi erkinligini ta’minlagan holda bir-biriga, jumladan AQSh kemalariga ham hujum qilmasligini» yozdi.

Husiylar – yamanlik shia jangari harakati bo‘lib, rasman «Ansorulloh» nomi bilan tanilgan. Ular Yaman hukumatiga qarshi, shuningdek, Saudiya Arabistoni va uning ittifoqchilariga faol qurolli qarshilik ko‘rsatadi, Isroilni asosiy dushmani deb hisoblaydi. Husiylar Qizil dengizda kemalarga hujum qilish orqali dengiz navigatsiyasini deyarli to‘xtatib qo‘ygan edi.