O‘zbekistonliklar daromadlarining o‘sishi sekinlashdi

2025 yilning birinchi choragida O‘zbekiston aholisining umumiy daromadlari 222,4 trillion so‘mga yetdi. Bu haqda Milliy statistika qo‘mitasi hisobotida keltirib o‘tilgan.

Hisobot davrida aholi daromadlarining nominal ko‘rinishdagi o‘sishi 20,9 foizni, real o‘sish sur’ati esa 9,8 foizni tashkil etgan. O‘tgan yilning mos davrida bu ko‘rsatkich mos ravishda 20,8 va 11,5 foiz bo‘lgandi.

Aholi jon boshiga umumiy daromadlar esa nominal qiymatda 18,5 foizga (2024 yilning I choragida – 18,2 foiz), real ko‘rinishda 7,6 foizga (9,2 foiz) ko‘paydi. Natijada 2025 yilning dastlabki 3 oyida aholi jon boshiga o‘rtacha daromad 5,9 mln so‘mga yetgan.

Hududlar kesimida daromadlarning eng yuqori ko‘rsatkichi Toshkent shahri (15 mln 859 ming so‘m), Navoiy (9 mln 452 ming so‘m), Buxoro (6 mln 364 ming so‘m) va Toshkent (6 mln 164 ming so‘m) viloyatlarida qayd etilgan. Poytaxt va 3 ta viloyatda aholi jon boshiga umumiy daromadlar respublikadagi umumiy ko‘rsatkichdan baland bo‘lgan.

Bu boradagi eng quyi ko‘rsatkichlar Namangan (3 mln 966 ming so‘m) va Surxondaryo (4 mln 78 ming so‘m) viloyatlari hamda Qoraqalpog‘iston Respublikasida (4 mln 117 ming so‘m) qayd etilgan.

Aholi jon boshiga daromadlarning eng yuqori real o‘sishi Farg‘ona (14,5 foiz) va Navoiy viloyati (10,1 foiz) hamda Toshkent shahrida (9,8 foiz) kuzatilgan. Jizzax (2,9 foiz), Toshkent (3,3 foiz) va Sirdaryo viloyatlarida (3,4 foiz) aholining real daromadlari juda kam miqdorda o‘sgan.

Aholining umumiy daromadlari tarkibi

Hisobot davrida aholi umumiy daromadlarining katta qismi yollanma ishchilarning daromadlari va mustaqil ravishda band bo‘lishdan olingan daromadlarni o‘z ichiga olgan mehnat faoliyatidan olingan daromadlardan (jami aholi umumiy daromadlarining 57,7 foizi) shakllangan. Aholi umumiy daromadlari tarkibida shaxsiy iste’mol uchun o‘zida ishlab chiqarilgan xizmatlardan olingan daromadlarning ulushi 7,7 foiz, mol-mulkdan olingan daromadlarning ulushi 4,7 foiz, transfertlardan olingan daromadlar ulushi 29,9 foizni tashkil qilgan.

Transfertlardan olingan daromadlarning ulushi Andijon, Farg‘ona, Samarqand, Surxondaryo, Qashqadaryo, Xorazm, Namangan viloyatlarida hamda Qoraqalpog‘iston Respublikasi va Buxoro viloyatida aholi umumiy daromadlariga nisbatan 30 foizdan yuqori ko‘rsatkichni tashkil etgan bo‘lsa, Navoiy viloyatida mazkur daromad turining ulushi eng past – 13,9 foiz bo‘lgan.

Xususan, aholining umumiy daromadlarida (boshqa joriy transfertlarni hisobga olgan holda) xorijdan pul o‘tkazmalarining ulushi 15,8 foizdan 19,5 foizgacha oshgan.

Pul o‘tkazmalariga eng katta bog‘liqlik Andijon, Farg‘ona va Samarqand viloyatlarida kuzatilgan.