Mask Tesla savdolari pasaygani tufayli DOGE'dagi faoliyatini qisqartiradi

Amerikalik milliarder Ilon Mask may oyidan boshlab Tesla kompaniyasiga e’tiborini kuchaytiradi, chunki 2025 yil birinchi choragida sotuvlar 20 foizga, foyda esa 71 foizga kamaygan. Bu haqda Politico xabar berdi.

22 aprel kuni investorlar bilan bo‘lib o‘tgan suhbatda Mask kelajakda Hukumat samaradorligi departamentidagi (DOGE) faoliyatiga faqat «bir-ikki kun» sarflashini aytgan. U o‘zining davlat faoliyati biznesga ta’sir qilgan yoki yo‘qligini to‘g‘ridan-to‘g‘ri bog‘lamadi, biroq tan oldi: «Hukumatda ishlagan vaqtim ma’lum bir ta’sir ko‘rsatdi».

Tesla umumiy daromadi 19,3 milliard dollarga (-9%), operatsion daromadi 0,4 milliard dollarga (-66 foiz) kamaydi. Asosiy sabablar: ta’minotning qisqarishi va avtomobillar narxining pasayishi.

Mask, Tesla ta’minot zanjirlari tufayli «tariflardan eng kam ta’sirlanganini» ta’kidladi. U, shuningdek, tariflarni pasaytirishga chaqirdi va ta’kidladi: «Buni prezident hal qilishi kerak».

DOGE ishini himoya qilib, Mask dastur «isrofgarchilik va firibgarlikka qarshi kurashda sezilarli yutuqlarga erishganini» aytdi va Tramp bilan hamkorlik muhimligini ta’kidladi: «Agar Amerika qulasa, hammamiz o‘lamiz - Tesla ham».

Avvalroq Reuters agentligi Ilon Mask boshchiligidagi Hukumat samaradorligi departamenti (DOGE) sun’iy intellekt yordamida federal hukumat xodimlarini kuzatib borishini yozgan edi. Manbalarga ko‘ra, Mask departamenti AQSh prezidenti Donald Trampga sodiq bo‘lmagan xodimlarni qidirmoqda.

Bundan tashqari, AQSh prezidenti Donald Tramp Maskning DOGE kompaniyasidagi faoliyati yakuniga yetayotganini aytdi. Shu bilan birga, u milliarder tez orada o‘z kompaniyalarini boshqarishga qaytishi kerakligini tan oldi.