“Oqibatlari og‘ir bo‘ladi” - Alisher Qodirov internetdagi “axborot loyihalari” haqida

Oliy Majlis Qonunchilik palatasi deputati, Milliy tiklanish siyosiy partiyasi raisi Alisher Qodirov axborot maydonida haqorat va tahqirlashlar og‘ir jinoyatga tenglashtirilishi va jiddiy jazolanishi kerakligini yozib chiqdi.

«Kimgadir adovat sochish uchun «xalq» so‘zidan qalqon yasab olayotganlar ortib bormoqda. Xalq fikrini ifoda qilish huquqi kimga berilgani Konstitutsiyada belgilab qo‘yilgan (10-modda), qolgan hamma o‘z nomidan gapirishi, muhokama, munozara qilishi va oqibatini zimmasiga olishni o‘rganishi kerak», deydi deputat.

Qodirov gapirilgan gaplari uchun «oqibatni zimmasiga olish» deganda bir necha kun oldin o‘zbekistonliklarni haqoratlagani uchun qo‘lga olingan tiktoker Valeriy Yugayni misol keltirgan.

Oliy Majlis deputatining fikricha, biznes va boshqaruvdagilar tor manfaatlarga erishish uchun ayrim shaxslarni internet tarmog‘ida muvofiqlashtirish va yo‘naltirishni o‘rganib olgan va buning oqibatlari og‘ir bo‘ladi.

«Afsuski, juda yomon tajriba, biznes va boshqaruv tor manfaatlarga erishish uchun shaxsiyat va farosatda majruhlarni internet tarmog‘ida muvofiqlashtirish va yo‘naltirishni o‘rganib oldi. Qonunlar bunday manipulyatorlarni to‘xtatishi, kim bo‘lishidan qat’i nazar keskin chora ko‘rishi kerak (tavsiya qilaman, «Nulevoy den» teleserialini ko‘rib chiqing).

Bunday axborot loyihalari vaqti bilan boshqarib bo‘lmaydigan maxluqqa aylanib ketib, birinchi navbatda mualliflari, keyinchalik, minglab yosh-u qari, katta-yu kichikni xonavayron qilishi mumkinligini Ukraina inqirozi yaqqol ko‘rsatib bermadimi?»

Shu sababli Alisher Qodirov boshchiligidagi Milliy tiklanish partiyasi erkinlik bahonasida madaniyat chegaralarini buzadiganlarga jazo kuchaytirilishini taklif qilmoqchi.

«Internet daromad ko‘rish bilan birga shaxsiy qarashlarni izoh qiladigan maydon ekani, albatta, yaxshi, bu so‘nggi davrning eng foydali kashfiyotlaridan biri, buni olqishlaymiz. Lekin erkinlik ekan deb tartib va madaniyat chegaralarini buzadigan beboshlar bilan murosani to‘xtatish kerak. «Milliy tiklanish» partiyasi bu masalada qonunga taklif tayyorlab, jamoatchilik bilan muhokama qilmoqchi», — deyiladi deputatning postida.