AQShda sud sun’iy intellekt tomonidan yaratilgan asar mualliflik huquqi bilan himoyalanmasligini tasdiqladi

Vashingtondagi Kolumbiya okrugi Federal apellyatsiya sudi inson ishtirokisiz sun’iy intellekt tomonidan yaratilgan san’at asari AQSh qonunchiligiga muvofiq mualliflik huquqi bilan himoyalanmasligini tasdiqladi. Bu haqda Reuters xabar bermoqda.

Sud AQSh Mualliflik huquqi boshqarmasi bilan kelishgan holda olim Stiven Talerning DABUS sun’iy intellekt tizimi yaratgan tasvirga mualliflik huquqi berilmasligi to‘g‘risidagi qarorni ma’qulladi.

2022 yilda Mualliflik huquqi boshqarmasi Talerning arizasini rad etib, mualliflik huquqi faqat inson tomonidan yaratilgan asarlarga nisbatan qo‘llanishi mumkinligini bildirgandi.

2023 yilda Kolumbiya okrugi federal sudyasi ushbu qarorni tasdiqladi va inson muallifligi “asrlar davomida shakllangan tushuncha”ga asoslanib, “mualliflik huquqining asosiy talabi” ekanini ta’kidladi.

Taler Kolumbiya okrugi Apellyatsiya sudiga yo‘llagan murojaatida bunday qaror “rivojlanayotgan sohaga sarmoya kiritish hamda u bilan ishlash istagini so‘ndirishi” mumkinligini aytgan.

Sudya Patrisiya Millettning aytishicha, AQShning mualliflik huquqi to‘g‘risidagi qonuni “barcha asar dastlab inson tomonidan yaratilishini talab qiladi”.

Avvalroq, Buyuk Britaniya Oliy sudi sun’iy intellektni ixtirochi sifatida tan olish va unga patent huquqi berilishi mumkin emas, degan xulosaga kelgandi.