Akmal Shukurov Qozog‘istondan Toshkentga ekstraditsiya qilindi

Poytaxtdagi tungi klublardan birining oldida erkakka og‘ir tan jarohati yetkazgan Akmal Shukurov Qozog‘istondan ekstraditsiya qilindi. U bezorilik va qasddan badanga og‘ir shikast yetkazishda ayblanmoqda.

Foto: IIBB axborot xizmati

Yakkasaroy tumanidagi «12» (Twelve) tungi klubi oldida sodir bo‘lgan voqea yuzasidan qo‘zg‘atilgan jinoyat ishi doirasida tergovdan yashirinib kelgan Akmal Shukurov Qozog‘istondan Toshkentga ekstraditsiya qilindi. Bu haqda poytaxt IIBB axborot xizmati xabar berdi.

16 martga o‘tar kechasi «12» tungi klubi oldida ikki kishi — Akmal Shukurov va uning tanishi Xurshid A. o‘rtasida janjal kelib chiqqan va mushtlashuvga aylangan. Boris Avakyan ularni ajratmoqchi bo‘lgan, ammo boshidan ikki marta zarba yeb, hushidan ketgan. U «bosh suyagi jarohati, o‘ng yonoq terisining yirtilishi» tashxisi bilan shifoxonaga yotqizilgan.

Idora ma’lumotlariga ko‘ra, ayblanuvchi Akmal Shukurov tergovdan yashiringan. Shu bois unga nisbatan qidiruv e’lon qilingan va 17 mart kuni u Qozog‘istonda qo‘lga olingan.

Holat yuzasidan Jinoyat kodeksining 277-moddasi (bezorilik) va 104-moddasi (qasddan badanga og‘ir shikast yetkazish) bilan ayblov e’lon qilingan.

«Hozirda Akmal Shukurov Qozog‘istondan Toshkent shahriga ekstraditsiya qilingan bo‘lib, tergov harakatlari davom ettirilmoqda. Mazkur holat bo‘yicha tergov harakatlari to‘liq va xolisona olib borilib, qonun ustuvorligi va jinoyat uchun jazo muqarrarligi ta’minlanadi», — deyiladi IIBB xabarida.

#ekstraditsiya #Akmal Shukurov