Guliston IIB TB talabi bilan Sankt-Peterburgda hibsga olingan o‘zbekistonlik ayolni Rossiya prokuraturasi qo‘yib yubordi

Guliston IIB TB talabi bilan Rossiyaning Sankt-Peterburg shahrida hibsga olingan o‘zbekistonlik ayol Rossiya prokuraturasining qarori bilan qo‘yib yuborildi. Bu haqda ayolning o‘zi Kun.uz’ga ma’lum qildi.

U Kun.uz’ga taqdim etgan Rossiya huquq organi hujjatida keltirilishicha, Rossiya Federatsiyasi Bosh prokuraturasi O‘zbekistonning vakolatli organiga S.A.ni ekstraditsiya qilish (topshirish)ni rad etish to‘g‘risida qaror qabul qilgan. Shu sababli ayolni ekstraditsiya doirasida qamoqda saqlash zarurati yo‘qolgan va u 66 kunlik tutqunlikdan so‘ng 2025 yil 13 fevralda qo‘yib yuborilgan.

Ayol 2024 yil 12 dekabr kuni ishlab yurgan joyi – Sankt-Peterburg oblastining Smolenskiy rayonida ushlanib, politsiya hibsxonasiga joylashtirilgandi.

Nima bo‘lgandi?

Kun.uz surishtiruvida ma’lum bo‘lishicha, Guliston shahrida yashovchi ayol shahar IIB boshlig‘i nomiga ariza bilan murojaat qilib, “o‘ziga tegishli bo‘lgan, opasining nomidagi xonadon nomiga rasmiylashtirib berilmayotganini ma’lum qilib, ushbu xonadonni o‘zining nomiga rasmiylashtirib berishda amaliy yordam” so‘ragan.

IIB Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) bilan jinoyat ishi qo‘zg‘atgan. Ayolga nisbatan sirtdan qamoqqa olish tarzidagi ehtiyot chorasi qo‘llanib, qidiruv e’lon qilinadi.