Toshkentda tanishini himoya qilishga uringan shaxs kuchli zarbadan so‘ng komaga tushib qoldi

16 martga o‘tar kechasi, tungi soat 02:30 atrofida Toshkent shahri Yakkasaroy tumanida joylashgan restoranlardan birida mushtlashuv sodir bo‘lgan. Videoda bir erkak boshqa fuqaro tomonidan yo‘llangan zarbalardan keyin hushini yo‘qotib yiqilganini ko‘rish mumkin.

Toshkent shahar IIBB ijtimoiy tarmoqlarda tarqalgan videolar yuzasidan bergan munosabatida aytilishicha, mijoz sifatida kelgan 30 yoshli Akmal Shukurov o‘zining tanishi, 40 yoshli Xurshid bilan o‘rtada kelib chiqqan nizo sababli o‘zaro janjallashgan. 35 yoshli Boris esa ularni ajratishga harakat qilgan vaqtida Akmal uni urib tan jarohati yetkazgan.

Tarqalgan videolarda 12 (Twelve) nomli tungi klub joylashgan The Tower mehmonxonasi oldida Akmal Borisga ikki bor musht tushirgani, jabrlanuvchi hushidan ketib yiqilganini ko‘rish mumkin. Tajovuzkor shaxs shundan keyin ham harakatlarini davom ettirib, Xurshidga hamla qilgan, ayollardan birini, Katyani ham kaltaklagan.

Boshqarma xabariga ko‘ra, Boris bosh miya jarohati, o‘ng yuzidan lunji yirtilgan jarohati va spirtdan zaharlanish tashxisi bilan shifoxonaga olib yotqizilgan.

Holat yuzasidan Yakkasaroy tumani IIO tomonidan Jinoyat kodeksining 277-moddasi (Bezorilik) bilan jinoyat ishi qo‘zg‘atilgan. Hozirda tergov harakatlari davom etmoqda.

Jabrlanuvchining yaqinlaridan biri Instagram sahifasida xabar qilishicha, unda tezkor ravishda 5 soatlik miya trepanatsiyasi operatsiyasi o‘tkazilgan, so‘ngra sun’iy komaga tushirilgan. Hozirda uning hayoti xavf ostida. Shifokorlar u o‘lim xavfi ostidaligi yoki butunlay nogiron bo‘lib qolish ehtimoli mavjudligini aytishgan.