Pavel Durovga Fransiyani tark etish uchun ruxsat berildi

Telegram asoschisi Pavel Durov sud ruxsati bilan Fransiyani tark etdi va Dubayga yo‘l oldi, deb xabar berdi AFP ma’lumotlariga tayanib RBK.

Durov 2024 yil avgustida Parijning Le Burjye aeroportida hibsga olindi. Da’volar Telegram moderatsiyasi va huquq-tartibot idoralari bilan hamkorlik qilishdan bosh tortish bilan bog‘liq bo‘lib, oqibatda tadbirkor bolalar pornografiyasi, firibgarlik va boshqa jinoyatlarni tarqatishda gumonlanuvchiga aylandi. U bir necha kun hibsda saqlandi, keyin 5 million yevro garov va haftasiga ikki marta politsiyaga xabar berish majburiyati evaziga qo‘yib yuborildi. Unga Fransiya hududini tark etish taqiqlandi. 2024 yilning noyabr oyidan boshlab Belgiya huquq-tartibot idoralari ham Durov ishi bo‘yicha tergovga qo‘shildi.

Parij prokurori Lor Bekko Durovga qarshi ishni kiberjinoyatlarga qarshi kurash nuqtai nazaridan namunali deb atadi va Telegram huquq-tartibot idoralarining so‘rovlariga, ayniqsa, bolalar pornografiyasiga oid so‘rovlarga javob bermaganini ta’kidladi. Tergov davomida Fransiya jandarmeriyasi 2013 yildan 2024 yilgacha Telegram huquq-tartibot organlarining so‘rovlariga javob bermagan 2400 dan ortiq holatni sanab o‘tdi.

Fevral oyi boshida Fransiya prokuraturasi Durovning ishi kamida bir yil davomida sudga yetkazilmasligini ma’lum qilgandi.