Rossiya koloniyalaridagi xorijliklarning 70 foizi Markaziy Osiyo davlatlari fuqarolari

Rossiyadagi jazoni o‘tash muassasalarida chet elliklar soni o‘sdi. Bu haqda Rossiya Jazoni ijro etish federal xizmati (FSIN) rahbari Arkadiy Gostev ma’lum qildi.

2025 yil 1 yanvar holatiga ko‘ra, qamoqlarda 30 mingdan ortiq xorijlik bo‘lib, ularning 69,5 foizi Markaziy Osiyo davlatlari fuqarolaridir.

«Umumiy taqdim etilgan ma’lumotlarga ko‘ra, muassasalardagi operativ vaziyat murakkablashmoqda. Ba’zi holatlarda qochish va garovga olish kabi favqulodda vaziyatlarga aylanmoqda», dedi Gostev.

Uning so‘zlariga ko‘ra, Rossiyada ekstremizm uchun qamalganlar soni ikki baravar ko‘paygan.

«Ozodlikdan mahrum qilish joylaridagi mahkumlar sonining qisqarishi ularning jinoiy tarkibining o‘zgarishi bilan birga bo‘ldi. Og‘ir va o‘ta og‘ir jinoyatlar sodir etganlik uchun qamalganlar ulushi 88 foizgacha oshdi», dedi Gostev.

Uning so‘zlariga ko‘ra, «terroristik xarakterdagi jinoyatlarni sodir etganlikda gumon qilinayotganlar, ayblanayotgan va sudlanganlar soni 45,5 foizga, ekstremistik xarakterdagi jinoyatlarni sodir etganlar 96 foizga, konstitutsiyaviy tuzum va xavfsizlik asoslariga qarshi jinoyat sodir etganlar 96 foizga oshgan».

Rossiya Ichki ishlar vazirligi 2024 yilning yanvar-noyabr oylarida chet ellik migrantlar va fuqaroligi bo‘lmagan shaxslar tomonidan 2023 yilning shu davriga nisbatan 2,1 foizga kam jinoyat sodir etilgani haqida xabar bergan edi. Og‘ir va o‘ta og‘ir jinoyatlar soni 3,9 foizga, qasddan badanga og‘ir shikast yetkazish holatlari 11,1 foizga, qotilliklar va qotillikka suiqasdlar 4,5 foizga kamaygan.