AQShda oqqush gavjum shossega yugurib chiqib, avtomobillar harakatini deyarli to‘xtatib qo‘ydi (video)

Floridada gavjum avtomobil yo‘liga yugurib chiqib, transportlar harakatni deyarli butunlay to‘xtatib qo‘ygan oqqush qutqarildi. Voqea joyidan olingan kadrlarni mahalliy Wesh telekanali e’lon qildi.

Orlando politsiyasi xodimlariga yo‘lga yugurib chiqqan oqqush haqidagi xabarlar kelib tushgan. Ular hodisa joyiga yetib kelishgach, qushni tutishga uringan, ammo bu oson kechmagan.

Kuzatuv kameralaridan olingan tasvirlarda bir nechta politsiyachi qutqaruvchilardan epchillik bilan qochayotgan oqqushni quvlayotgani ko‘rinadi. Shu bilan birga, quvlash paytida barcha yo‘l chiziqlari to‘silgani sababli, atrofdagi yo‘nalishlarda transport harakati deyarli to‘xtab qolgan.

Oxir-oqibat oqqushni tutib, katta choyshabga o‘rashdi. Qush yaqin atrofdagi ko‘lda yashashi taxmin qilinmoqda. Oqqushlar bo‘yicha mutaxassisning aytishicha, hozir oqqushlarning juftlashish mavsumi bo‘lgani uchun, qush “avtomagistralga osongina uchib kirgan bo‘lishi mumkin”.

Ushbu voqea oqibatida tan jarohati olganlar yoki baxtsiz hodisalar qayd etilmagan.