Britaniya razvedkasi: Rossiya Kursk oblastida bosimni oshiryapti

Rossiya qo‘shinlari hujumning asosiy yo‘nalishini Kursk oblastiga qaratdi, bu esa Ukraina qurolli kuchlari uchun frontning boshqa hududlarida qarshi hujumga o‘tish uchun yangi imkoniyatlar ochdi. Bu haqda Buyuk Britaniya Mudofaa vazirligi 10 mart, dushanba kuni X  ijtimoiy tarmog‘ida chop etilgan kundalik razvedka sharhida ma’lum qildi.

Britaniya harbiy razvedkasi ma’lumotlariga ko‘ra, rus qo‘shinlari Kursk oblastida Ukraina qo‘shinlariga bosimni kuchaytirib, uch yo‘nalishdan – g‘arb, shimol va sharqdan hujum qilmoqda. Shu bilan birga, Ukraina qo‘shinlari taxminan 300 kvadrat kilometr maydonni nazorat qilayotgan bo‘lishi mumkin. 

Frontning boshqa hududlarida Rossiya hujum harakatlarining intensivligi 2024 yil oxiri va 2025 yil boshiga nisbatan kamaydi, deyiladi sharhda. Bu Ukraina qurolli kuchlariga, xususan, Rossiyaning asosiy bo‘linmalari to‘plangan Donetsk oblasti Pokrovsk rayonida qarshi hujumlarni kuchaytirishga imkon berdi. Xabar qilinishicha, Ukraina qo‘shinlari Peschane, Udachne, Shevchenko yaqinida hamda T-0506 logistika magistralining janubida muvaffaqiyatli qarshi hujumga o‘tgan.

«Ukrainaning qarshi hujum qilish qobiliyati Rossiya tomonidan o‘tkazilayotgan quruqlikdagi hujum operatsiyalari sonining qisqarishi hisobiga yaxshilandi. Pokrovsk o‘qidagi Rossiya ta’minot liniyalari ham Ukraina uchuvchisiz uchish tizimlarining hujumlari tufayli zaiflashdi», — deb yozadi Buyuk Britaniya MV.

Rossiya Ukraina kuchlari Kurskdagi qator qishloqlardan chiqarib yuborilganini e’lon qildi

Rossiya Mudofaa vazirligi kecha kechqurun Kursk oblastidagi Malaya Loknya, Cherkasskoye Porechnoye va Kositsa qishloqlari ozod qilingani haqida xabar berdi. Bundan tashqari, internetda Martinovka qishlog‘idagi rossiyalik harbiylarning videolari paydo bo‘ldi. Rossiya harbiy departamenti ushbu aholi punkti ozod qilinganini hali rasman e’lon qilmagan, ammo bu ma’lumotni 9 mart kuni Ukraina Mudofaa vazirligiga yaqin bo‘lgan DeepState OSINT loyihasi tasdiqlagan.

So‘nggi ikki kun ichida Rossiya Mudofaa vazirligi, shuningdek, rus qo‘shinlari Kurskning Lebedevka, Viktorovka, Nikolayevka va Staraya Sorochina qishloqlari hamda Ukrainaning Sumi oblastidagi Novenkoye qishlog‘ini nazoratga olgani haqida xabar berdi.

Rossiya qo‘shinlari Sumi oblastidagi Ukraina davlat chegarasi hududida mustahkam o‘rnashib olishga harakat qilmoqda, dedi Ukraina Davlat chegara xizmati matbuot kotibi Andrey Demchenko 10 mart kuni milliy telemarafon chog‘ida efirda. «Dushman allaqachon Ukraina hududida shunday tajovuzkor harbiy harakatlar zonasini yaratishga harakat qilmoqda, u yerda o‘z o‘rnini egallashga harakat qilmoqda. Bular bir necha kishidan iborat kichik hujum guruhlari. Ular asta-sekin to‘planib, keyinchalik chuqurroq kirib borish uchun bizning hududimizga kirishga harakat qilmoqda», dedi u.

Demchenkoning so‘zlariga ko‘ra, Rossiya Federatsiyasi Novenkiy rayonida hujum qilish orqali Kursk oblastida operatsiya o‘tkazayotgan Ukraina qurolli kuchlarini ta’minlovchi logistika yo‘llarini to‘sib qo‘ymoqchi.