Germaniya Tramp F-35 samolyotlarini «o‘chirib qo‘yishi» mumkinligidan xavotirda

Germaniya AQShning Ukrainaga qurol-yarog‘ va razvedka ma’lumotlari yetkazib berishni to‘satdan to‘xtatib qo‘yishi ortidan Vashington bilan harbiy aviatsiya sohasida hamkorlik xavf tug‘diradimi yoki yo‘qmi, shu masalani muhokama qilmoqda. Amerikaning F-35 qiruvchi samolyotlarini tez o‘chirish funksiyasi (Kill Switch) Germaniya havo kuchlarini (lyuftvaffe) Oq uyga qaram qilib qo‘yishi mumkin, deb yozadi Germaniyaning Handelsblatt va Bild  gazetalari 8 mart, shanba kuni.

Harbiy sanoatdagi manba Handelsblatt'ga vahimaga berilmaslik kerakligini aytdi va Vashington lyuftvaffeni qaram qilib qo‘yishi va uni qo‘llab-quvvatlashni to‘xtatishi dargumon deb atadi. «Bunday holatda biz F-35'ni ehtiyot qismlar tugaguncha yoki samolyot tizimni yangilashni talab qilmaguncha ishlata olamiz», — dedi manba nashrga.

Handelsblatt'ning eslatishicha, Lockheed Martin avvalroq F-35 qiruvchi samolyotlari uchun dasturiy ta’minot bilan bog‘liq muammolarga duch kelgan. Bu Daniya, Norvegiya va Belgiyaga mashinalarni yetkazib berishda kechikishlarga olib keldi.

Siyosatchilarning munosabati

Bundestagdagi Xristian-demokratik va Xristian-sotsial ittifoq (XDI/XSI) fraksiyasi rahbari o‘rinbosari Yoxann Vadeful Handelsblatt gazetasiga bergan intervyusida konservativ blok F-35 uchun shartnomadan voz kechish niyatida emasligini aytdi. Uning partiyadoshi, Bundestag deputati Ingo Gedexens bu masalani chuqurroq o‘rganishga chaqirdi.

«Biz yaqindan ko‘rib chiqishimiz va ehtiyot bo‘lishimiz kerak. Agar biz F-35 kabi qurol tizimiga shunchalik ko‘p pul sarflasak, uni qanday ishlatishni ham o‘zimiz hal qilishimiz kerak», dedi Gedexens 8 mart kuni Bild gazetasiga. «Biz Bundesver uchun sotib olgan Amerika qurol tizimlari shunchaki o‘chirib qo‘yilishi mumkin emas».