Avstraliyada o‘smir o‘qotar qurol bilan samolyot bortiga yashirincha chiqdi

Avstraliyada 17 yoshli o‘smir ov miltig‘i va o‘q-dorilar bilan samolyot bortiga yashirincha chiqib oldi, deb xabar bermoqda The Guardian.

Voqea 6 mart kuni Melburnda sodir bo‘lgan. Qurollangan o‘smir aeroport xodimining yorug‘lik qaytaruvchi kiyimini kiyib olib, to‘siqning tuynugidan uchish-qo‘nish yo‘lagiga o‘tgan. Shundan so‘ng u Sidneyga uchishi kerak bo‘lgan samolyotga chiqib olgan.

Samolyotda 160 nafar yo‘lovchi bor edi. Yigit qurolini yashirishga urinmagan ham — odamlar uning qurollanganini darhol payqadi. Uch kishi o‘smirni ushlab, politsiyaga xabar berdi. Huquq-tartibot xodimlari avstraliyalikni hibsga oldi. Hech kim jarohat olmadi.

Aeroport yaqinida yigitning mashinasi topildi. Ilgari o‘smir hech qanday jinoyat bo‘yicha javobgarlikka tortilmagan. Uning terroristik guruhlar bilan aloqasi bor-yo‘qligi ham noma’lum. O‘smirga nisbatan hali ayblov e’lon qilinmadi.