Starship raketasi ketma-ket ikkinchi marta sinov paytida portladi

SpaceX kompaniyasining Starship koinot kemasi navbatdagi sinov paytida yana portladi. Kompaniya 6 mart kuni Texasning Boka-Chika shahridagi bazasidan navbatdagi sinov parvozini amalga oshirdi. Oldingi sinov ham muvaffaqiyatsiz yakunlangan edi.

6 mart kungi parvoz Starship chidamliligini sinab ko‘rish uchun mo‘ljallangan edi, deb xabar berdi CNN. Yanvar oyidagi muvaffaqiyatsiz sinovdan so‘ng kompaniya keyingi avlod raketalariga yong‘in chiqishining oldini olish uchun yangilangan shamollatish tizimlari o‘rnatilishini aytgan edi.

Super Heavy raketasining qayta foydalanish mumkin bo‘lgan birinchi qismi uchirish maydonchasiga muvaffaqiyatli qaytarildi. Biroq uchirilgandan taxminan 9,5 daqiqa o‘tgach, SpaceX kompaniyasi Starship bilan aloqani yo‘qotdi, deyiladi kompaniya bayonotida.

Starship kemasida bir nechta dvigatellar o‘chib qoldi, u tartibsiz aylana boshladi va keyin portladi. SpaceX kompaniyasi kema boshqaruvining yo‘qotilishiga uning orqa qismidagi «energetik hodisa» sabab bo‘lganini ma’lum qildi. Portlash Karib dengizida sodir bo‘ldi va Florida shtatining bir qismidan ko‘rinib turdi.

AQSh Federal aviatsiya boshqarmasi (FAA) hodisa tufayli xavfsizlik yuzasidan yaqin atrofdagi aeroportlarga fuqarolik samolyotlari parvozlarini to‘xtatdi. Keyinchalik, taqiq olib tashlandi.

Starship qayta ishlatiladigan o‘ta og‘ir raketadir. U Super Heavy raketasi va Starship koinot kemasidan iborat. SpaceX tizimi kelajakda Oy va Marsga missiyalar uchun asos bo‘lishiga umid qilinmoqda.