Braziliyada bir vaqtda 4500 ta asalari chaqqan o‘smirning hayoti saqlab qolindi

Braziliyada 14 yoshli maktab o‘quvchisini bir vaqtning o‘zida 4,5 mingta asalari chaqdi, ammo shifokorlar o‘smirning hayotini saqlab qolishga muvaffaq bo‘ldi. Bu haqda Metropoles xabar bermoqda.

Voqea Vitor Ugo Ferreyra Duarte ta’lim olayotgan maktab yaqinida yuz bergan. U o‘sha yerda koptok o‘ynayotganida tasodifan asalari uyasiga zarar yetkazgan, natijada hasharotlar o‘smirga hujum qilgan. Mahalliy aholi arilarni olov yordamida haydashga urindi, biroq tutun va issiqlik ularni yanada “g‘azablantirdi”.

Shifokor voqea joyiga yetib kelganida o‘smir butunlay hasharotlar bilan qoplangan edi. Natijada Vitor intensiv terapiya bo‘limiga olib borildi: unga tinchlantiruvchi dorilar yuborildi va nafas yo‘liga naycha ulandi.

Bolaning yaqinlari aytishicha, u hozir mustaqil nafas olishni boshlagan, ammo unga hanuz sun’iy nafas oldirish apparati kerak bo‘lishi mumkin. Organizmiga juda ko‘p miqdorda asalari zahri kirgani sababli o‘quvchining buyraklari ham jiddiy zararlangan. Shunday bo‘lsa-da, umuman olganda, Vitorning ahvoli yaxshilanmoqda.

Avvalroq Britaniyada Endryu Pauell ismli 57 yoshli erkak arilar to‘dasi hujumidan o‘lishiga bir baxya qolgandi. Arilar uni 240 marotaba chaqqan.