Farg‘onada o‘g‘irlikka tushgan yigit onani bolalari ko‘z o‘ngida o‘ldirdi

Farg‘ona shahrida yashovchi yigit shaharning Beshbola mahallasida yashovchi, uch nafar voyaga yetmagan bolalarning onasi bo‘lgan ayolni o‘ldirdi. Bu haqda IIV axborot xizmati xabar bermoqda.

Sud hujjatlaridan ma’lum bo‘lishicha, onlayn qimorga berilib qolgan 29 yoshli yigit qarzga botadi. So‘ng u Farg‘ona shahridagi o‘zi yashaydigan mahallaga qo‘shni bo‘lgan Beshbola mahallasidagi xonadonga o‘g‘irlikka tushadi.

U avvaliga bo‘sh xonalarga kirib pul qidiradi. Hech narsa topa olmagach xonadon sohibasi 3 nafar farzandi bilan uxlab yotgan xona eshigi oldiga keladi.

Shu paytda ayol tasodifan tashqariga chiqadi va o‘g‘riga ko‘zi tushadi. Eshigi oldida yuziga niqob taqqan begona yigitni ko‘rgan ayol baqiradi va shunda uning bolalari ham uyg‘onishadi.

Ayol xona ichiga kirib eshikni ichkaridan yopishga urinadi. Shunda yigit xonaga kirib uch nafar bolaning ko‘z o‘ngida ayolga pichoq uradi va voqea joyidan qochib ketadi. Og‘ir tan jarohati olgan ayol vafot etadi. Tezkor qidiruv harakatlari natijasida tez orada yigit ushlanadi.

“Ruxsor TV” telekanalida berilgan lavhada aytilishicha, Jinoyat ishlari bo‘yicha Farg‘ona shahar sudida o‘tkazilgan sud majlisida yigit Jinoyat kodeksining 97-moddasi 2-qismi “j” bandi va 164-moddasi 2-qismi “v” bandi bilan aybdor deb topilgan. Unga 17 yil qamoq jazosi berilgan.