AQSh Meksika chegarasiga yana 1,5 ming harbiy xizmatchini yuboradi

AQSh Meksika orqali noqonuniy migrantlarning mamlakatga kirishiga chek qo‘yish maqsadida yana 1,5 ming askarni chegaraga jo‘natishga tayyorlanmoqda, deb xabar beradi Anadolu Ajansi.

Nashrning Vashingtondagi manbasiga ko‘ra, Shimoliy Karolinada joylashgan 18-havo-desant korpusining moddiy-texnik ta’minot brigadasi mamlakat janubiy chegaralariga borish ko‘rsatmasini olgan.

Amaldorning so‘zlariga ko‘ra, prezident Tramp «migratsiyaning oldini olish bo‘yicha kuchaytirilgan bosimni qo‘llab-quvvatlash maqsadida» yana 1,5 mingga yaqin harbiy xizmatchini janubiy chegaraga yuboradi.

Chegaraga joylashtirilishi rejalashtirilgan yangi qo‘shin AQSh va Meksika o‘rtasiga tikanli sim to‘siqlar o‘rnatish, shuningdek, chegara patruliga zarur transport, razvedka va boshqa ko‘maklarni ko‘rsatish bilan shug‘ullanadi.

Tramp prezidentlik lavozimiga kirishganidan beri Pentagon 1,6 ming kishilik harbiy bo‘linmani chegaraga joylashtirgan. Bundan tashqari, 500 nafarga yaqin dengiz piyodalarini jinoyat sodir etgan noqonuniy migrantlar saqlanuvchi Kubadagi Guantanamo bazasiga yuborish bo‘yicha qaror qabul qilgan.

Avvalroq, AQSh prezidenti Donald Tramp mamlakatdagi migrantlar bilan bog‘liq vaziyatga e’tibor qaratib, AQSh-Meksika chegarasida favqulodda holat e’lon qilgan va nazorat-o‘tkazish punktlarini yopgan edi. Shuningdek, u noqonuniy migrantlar ommaviy deportatsiya qilinishini aytdi. Meksika AQSh hududiga o‘tmoqchi bo‘lgan noqonuniy migrantlar uchun asosiy tranzit mamlakati hisoblanadi.