AQShning bo‘lajak moliya vaziri Rossiyaga qarshi sanksiyalarni kuchaytirishga va’da berdi

AQSh moliya vaziri lavozimiga nomzod Skott Bessent Rossiyaga qarshi neft bo‘yicha sanksiyalarni kuchaytirishga chaqirdi. Bu haqda u 16 yanvar, payshanba kuni AQSh Senati moliya qo‘mitasining eshituvlarida aytib o‘tdi. Tadbir Associated Press (AP) tomonidan translatsiya qilindi.

Senator-demokrat Uorner: «Biz yetarlicha ish qilmadik»

Rossiya va Ukrainaga nisbatan siyosat masalasini senator-demokrat Mark Uorner ko‘tardi. «Men shuni his qilyapmanki, biz Vladimir Putinga Ukrainadagi tajovuzkor va dahshatli xatti-harakatlari uchun munosib javob bera olmaymiz», deb shikoyat qildi qonun chiqaruvchi.

«Biz yetarlicha ish qilganimiz yo‘q. Ochig‘ini aytganda, sanksiyalar rejimi, menimcha, kerak bo‘lgan darajada samarali bo‘lmadi. Bayden ma’muriyati neft va tankerlarga qo‘shimcha sanksiyalarni joriy etishda juda kech qoldi, deb o‘ylayman», deya qo‘shimcha qildi Uorner. U Bessent sanksiyalar rejimini yanada kuchaytirishni rejalashtiryaptimi yoki yo‘qmi, shu haqda so‘radi.

Bessent "Gazprom neft" va "Surgutneftegaz"ga qarshi sanksiyalar haqida

«Ukrainada sodir bo‘layotgan fojia ongli hayotimdagi eng katta fojialardan biridir. Men moliya vaziri etib tayinlansam, uni tezroq tugatishni xohlayman», deb javob berdi Bessent.

10 yanvar kuni «Gazprom neft», «Surgutneftegaz» va boshqa o‘nlab Rossiya neft xizmatlari ko‘rsatuvchi kompaniyalari, treyderlar va tankerlarga nisbatan joriy qilingan AQSh sanksiyalarini sharhlar ekan, Bessent shunday dedi: «Oq uyning milliy xavfsizlik bo‘yicha maslahatchisi Jyeyk Sallivan ketishidan bir necha kun oldin Rossiya neft kompaniyalariga qarshi sanksiyalarni kuchaytirganini ko‘rib hayron bo‘ldim. Haqiqatan ham, bu oyda AQShda neft narxi 9 foizga oshdi».

Bessentning so‘zlariga ko‘ra, yaqin vaqtgacha AQShning Rossiya neft sektoriga qarshi sanksiyalari juda zaif edi, chunki Bayden ma’muriyati, ayniqsa, AQShdagi saylov arafasida Rossiyadan eksport kamaysa, jahon bozorida va AQShning o‘zida neft narxi oshishidan xavotirda bo‘lgan. Shu bilan birga, demokratlar mahalliy neft ishlab chiqarishni chekladilar, deya ta’kidladi moliya vaziri lavozimiga nomzod. Uning ishonch bildirishicha, AQShda qazib olish hajmining oshishi Rossiya neft kompaniyalariga nisbatan sanksiyalarni kuchaytirish imkonini beradi.