Kolumbiyada kichik samolyot qulashi oqibatida 10 kishi halok bo‘ldi

Kolumbiya shimoli-g‘arbida kichik samolyot qulab tushdi. Bu haqda Antokiya departamenti Xatarlarni boshqarish byurosi departamenti Karlos Rios Puertaga tayanib, «Sinxua» agentligi xabar berdi.

8 yanvar kuni bedarak yo‘qolgan deya e’lon qilingan Pacifica Travel kompaniyasi samolyoti Kolumbiya shimoli-g‘arbidagi Antokiya departamenti hududiga qulagani aniqlandi. Uning bortida ikki nafar ekipaj a’zosi va sakkiz yo‘lovchi bo‘lgan.

«Afsuski, omon qolganlar yo‘q. Hodisa joyida 37 nafar xodim ish olib bormoqda va biz jasadlarni chiqarib olish va sud politsiyasi bilan muvofiqlashtirishni o‘z ichiga oladigan ikkinchi bosqichni tezlashtiryapmiz», — deydi Puerta.

Uning so‘zlariga ko‘ra, noqulay ob-havo sharoiti jasadlarni chiqarib olish jarayonlarini qiyinlashtirgan, chunki vertolyotlar xizmatidan foydalanish imkonsiz bo‘lib qolmoqda.

Kolumbiya Transport vazirligi va Fuqarolik aviatsiyasi boshqarmasi halok bo‘lganlar oilalariga hamdardlik bildirgan. Holat yuzasidan tergov harakatlari boshlangan.

Eslatib o‘tamiz, 29 dekabr kuni Bangkokdan parvoz qilgan Jeju Air aviakompaniyasining Boeing 737-800 samolyoti uchish-qo‘nish yo‘lagidan chiqib ketdi va Janubiy Koreyaning Muan okrugidagi aerodrom panjarasiga borib urilgandi. Ushbu halokat bortdagi 181 kishidan 179 nafarining hayotiga zomin bo‘lgan.

Undan oldinroq, 25 dekabr kuni Bokudan Grozniyga uchgan Azerbaijan Airlines (AZAL) samolyoti Oqtov yaqinida halokatga uchrashi oqibatida 38 kishi halok bo‘lgandi.