O‘zbekiston elektrotexnika mahsulotlari eksporti hajmini uch baravarga oshirishni rejalashtirmoqda

Belgiyaning The European Geopolitical Forum saytida "O‘zbekiston Yevropa, Janubiy Osiyo va Yaqin Sharq mamlakatlariga elektrotexnika mahsulotlari eksportini oshirishni rejalashtirmoqda" sarlavhali maqola e’lon qilindi, deb xabar bermoqda "Dunyo".

Foto: yuz.uz

Unda qayd etilishicha, O‘zbekistonning elektrotexnika sohasida mingga yaqin ishlab chiqarish korxonalari faoliyat ko‘rsatmoqda. Shu bilan birga, sanoatning deyarli barcha korxonalari xususiydir. Sanoatda band bo‘lganlarning umumiy soni esa 35 mingdan ortiq kishini tashkil etadi.

"2022-2026 yillarga mo‘ljallangan Yangi O‘zbekistonning taraqqiyot strategiyasida 2026 yilga kelib sanoat mahsulotlari ishlab chiqarish hajmini 1,4 baravar, shu jumladan, elektrotexnika sanoatida yuqori qiymatli mahsulotlar ishlab chiqarish hajmini 2 baravar va eksport hajmini 3 baravar oshirish ko‘zda tutilgan", – deyiladi portalda.

Shu bilan birga, maqolada yozilishicha, 2027 yil 1 yanvargacha elektrotexnika sanoati korxonalari foyda va mulk solig‘ini 50 foizga kamaytirdilar. Bundan tashqari, o‘z ishlab chiqarish ehtiyojlari uchun import qilinadigan xomashyo, butlovchi qismlar va uskunalarga bojxona to‘lovlaridan ozod qilish bo‘yicha imtiyozlar uzaytirildi.

Shuningdek, maqolada O‘zbekistonda qiymati 260 million dollardan ortiq bo‘lgan 800 dan ortiq yangi investitsiya loyihalari, jumladan, 50 million dollarlik 120 kabel ishlab chiqarish, 115 million dollarlik 380 maishiy texnika, 40 million dollarlik 60 energiya uskunalari va 58 million dollarlik 250 boshqa elektrotexnika loyihalari ishga tushirilgani xabar qilingan.

#eksport #elektrotexnika