Navoiy va Tatariston mineral-xomashyo resurslarini qayta ishlashda hamkorlik qiladi

Tatariston raisi Rustam Minnixonov Navoiy viloyatiga keldi. Uni Navoiy temiryo‘l vokzalida Navoiy viloyati hokimi Normat Tursunov kutib oldi. Bu haqda viloyat hokimligi matbuot xizmati xabar bermoqda.

Uchrashuvda ikki tomonlama manfaatli hamkorlik loyihalarini, xususan, sanoat kooperatsiyasi, mineral-xomashyo resurslarini chuqur qayta ishlashni amalga oshirish imkoniyatlari ko‘rib chiqildi. Shuningdek, turizm, viloyatdagi va Tataristondagi oliy ta’lim muassasalari o‘rtasida konchilik va metallurgiya, qishloq va suv xo‘jaligi, qayta tiklanuvchi energiya manbalari, oliy ta’lim, fan va innovatsiyalar sohasida hamkorlik istiqbollari belgilab olindi. 

Delegatsiya a’zolari Navoiy erkin iqtisodiy zonasida ham bo‘lishib, “Navoiy sanoatni rivojlantirish kompleksi” sanoat parki taqdimoti bilan tanishgan. Mazkur sanoat parki Tatariston va O‘zbekiston o‘rtasidagi hamkorlik namunasi hisoblanadi. U Navoiy viloyati va “Master” Kama sanoat parki o‘rtasidagi kelishuvga asosan bunyod etilmoqda.

Parkni bunyod etishda Qayta qurish va rivojlantirish fondi tomonidan 40 mln AQSh dollari miqdorida sarmoya ajratilgan. Birinchi bosqichda umumiy qiymati 178 mln dollar bo‘lgan 6 ta loyihani amalga oshirish rejalashtirilgan.

Tatariston raisi Rustam Minnixonov avvalroq Surxondaryo viloyatida ham bo‘lib, viloyat hokimi Ulug‘bek Qosimov bilan qator hamkorlik loyihalarini muhokama qilgandi.