Bojxonadan olib o‘tilayotgan tovar kelib chiqish mamlakati to‘g‘risida dastlabki qarorni qabul qilish tartibi joriy etiladi

Iqtisodiyot va moliya vazirining “Tovarning kelib chiqish mamlakati to‘g‘risidagi dastlabki qarorni qabul qilish tartibi haqidagi nizomni tasdiqlash to‘g‘risida”gi buyrug‘i loyihasi e’lon qilindi.

Foto: Kun.uz

O‘zbekiston Respublikasi bojxona chegarasi orqali olib o‘tilayotgan va O‘zbekiston Respublikasi hududida qayta ishlash jarayonida hosil bo‘lgan tovarlarning kelib chiqish mamlakati to‘g‘risidagi dastlabki qarorni qabul qilish tartibi joriy qilinmoqda.

Tovarlarning kelib chiqish mamlakati to‘g‘risida qaror qabul qilish uchun zarur bo‘lgan hujjatlar va ma’lumotlarni taqdim etish bo‘yicha muayyan tartib va talablar belgilanadi.

Tovarlarning kelib chiqish mamlakatini aniqlash uchun hujjatlarni taqdim etish va arizalarni ko‘rib chiqish uchun muayyan muddatlar belgilanadi.

Bojxona organi tomonidan qabul qilingan dastlabki qarordan norozi bo‘lgan manfaatdor shaxs tegishli tartibda shikoyat qilishi imkoniyati yaratiladi.

Bojxona organlari tovarlarning kelib chiqish mamlakati to‘g‘risida dastlabki qaror qabul qilishda shaffoflik va adolat tamoyillari asosida Jahon savdo tashkiloti (JST) va boshqa xalqaro tashkilotlar tomonidan belgilangan xalqaro standartlarga rioya qilishlari shartligi belgilangan.

Dastlabki qaror qabul qilinganligi uchun belgilangan miqdorda bojxona yig‘imi undiriladi.

Dastlabki qarorga bojxona organining tashabbusi bilan o‘zgartirish kiritilgan taqdirda, bojxona yig‘imi undirilmaydi.

#bojxona #tovar