Ohangarondagi texnopark ishtirokchilari subsidiyalar bilan qo‘llab-quvvatlanadi

Vazirlar Mahkamasining “Ohangaron Tech Industrial texnoparki ishtirokchilarini qo‘llab-quvvatlash chora-tadbirlari to‘g‘risida”gi qarori qabul qilindi.

Prezidentning “Mis va noyob metallar xomashyosini qayta ishlashning texnologik zanjirlarini kengaytirish chora-tadbirlari to‘g‘risida”gi qaroriga muvofiq quyidagilarning respublika budjetidan qoplanishini nazarda tutuvchi Texnopark ishtirokchilarining innovatsion, ilmiy-tadqiqot va tajriba-konstruktorlik faoliyatini qo‘llab-quvvatlash nazarda tutilgan:

mis va noyob metallar xomashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini ta’minlash, ishlab chiqarish va mahsulot sifatini axborot tizimlari orqali boshqarish va nazorat qilish bo‘yicha ilmiy tadqiqotlar va tajriba-konstruktorlik ishlanmalariga sarflangan xarajatlarning 50 foiz miqdori (biroq 1 mlrd so‘mdan oshmaydigan qismi);

ushbu ilmiy tadqiqotlar va tajriba-konstruktorlik ishlanmalarni joriy qilish bo‘yicha loyihalashtirish, injiniring va texnologiyalar transferi xizmatlarni ko‘rsatish (ishlarni bajarish) bilan bog‘liq xarajatlarning 20 foizgacha miqdori.

Quyidagilarni nazarda tutuvchi Ohangaron Tech Industrial texnoparki ishtirokchilarining innovatsion, ilmiy-tadqiqot va tajriba-konstruktorlik faoliyatini qo‘llab-quvvatlash tartibi to‘g‘risidagi nizom tasdiqlandi:

texnopark ishtirokchilarining ilmiy-tadqiqot ishlari va tajriba-konstruktorlik ishlanmalari xarajatlarini qoplash tartibi;

texnopark ishtirokchilarining loyihalash, injiniring va texnologiyalar transferi xizmatlarini ko‘rsatish (ishlarini bajarish) bilan bog‘liq xarajatlarini qoplash tartibi.