3 nafar hokim va yana 3 nafar mansabdor tadbirkorlik bilan shug‘ullanmoqda – Antikorrupsiya agentligi

Korrupsiyaga qarshi kurashish agentligi tomonidan o‘tkazilgan o‘rganishlar davomida qonun va qonunosti hujjatlariga zid ravishda tadbirkorlik faoliyati bilan shug‘ullanib kelayotgan mansabdorlar aniqlandi. Xususan, 6 nafar rahbar mansabdor shaxs — 3 nafar tuman-shahar hokimi, 1 nafar agentlik, 1 nafar unitar korxona va 1 nafar qo‘mita rahbari tadbirkorlik sub’yektlarining ta’sischilari ekani ma’lum bo‘lgan:

• Milliy antidoping agentligi direktori A.Sodikov “Total Oil” MChJ;
• “Axborotlashtirish Bosh markazi” DUK rahbari D.Sarixo‘jayev “Musammo” MChJ;
• Andijon viloyati Bo‘ston tumani hokimi S.Nosirova Sabina Issiq Nonlari 777” va “Ko‘mir Sanoati” MChJlar;
• Navoiy viloyati Qiziltepa tumani hokimi U.Fayziyev “Zarafshan Golden Group” va "Zarafshon Grand Invest" MChJlar, “G‘ani Bobo Chorvasi” fermer xo‘jaligi;
• Toshkent shahar Yakkasaroy tumani hokimi A.Sayfutdinov “Sanico Group” va “Uv-Maks” MChJlar;
• Ipakchilik va jun sanoatini rivojlantirish qo‘mitasi rahbari B.Sharipov “Karomat Oyijon-Surxon” fermer xo‘jaligida ta’sischi sifatida faoliyat yuritib kelayotgani aniqlandi.

Ma’lum qilinishicha, aniqlangan holatlar bo‘yicha mazkur davlat organlari va ularning yuqori turuvchi idoralariga Antikorrupsiya agentligi tomonidan tegishli taqdimnomalar kiritilgan. Shuningdek, manfaatlar to‘qnashuvi holatlariga barham berilishi, ya’ni mansabdor shaxslarning tadbirkorlik sub’yektlaridagi faoliyati tugatilishi choralari ko‘rilmoqda.

Ma’lumot uchun, “Davlat fuqarolik xizmati to‘g‘risida”gi qonunining 13-moddasiga ko‘ra, davlat fuqarolik xizmatchisi tadbirkorlik faoliyati sub’yektlarini tashkil etishga, ularning muassisi (ishtirokchisi) bo‘lishga, tadbirkorlik faoliyati sub’yektida tashkiliy-boshqaruv, ma’muriy-xo‘jalik vazifalarini bajarishi mumkin emas.

Bundan tashqari, hukumat qarori bilan tasdiqlangan “Davlat fuqarolik xizmatchilari odob-axloqining namunaviy qoidalari”ning 13-bandida davlat xizmatchilari ishdan tashqari vaqtda tadbirkorlik yoki haq to‘lanadigan boshqa faoliyat bilan (pedagogik, ilmiy va ijodiy faoliyatdan tashqari) shug‘ullanmasligi belgilangan.

Avvalroq, Kun.uz qonunchilikda taqiqlangan bo‘lsa-da, ayrim tuman va shahar hokimlari firmalar rahbarligini ham o‘z qo‘llarida saqlab qolayotganiga doir tanqidiy maqolalar e’lon qilgan edi.

UPD. Toshkent shahar Yakkasaroy tumani hokimligining ma’lum qilishicha, Kun.uz'dagi tanqidiy maqoladan so‘ng, joriy yil 13 iyun kuni tuman hokimi Anvar Sayfutdinov “Sanico Group” va “Uv-Maks” MChJlar ta’sischiligidan chiqqan. Hokimlik mas’ullari bu haqda Kun.uz'ga taqdim qilgan rasmiy hujjatlarini Antikorrupsiya agentligi ham yuborilganini bildirdi.