“GESlarimiz portlatilgan taqdirda qiladigan ishlarimiz loyihasi mavjud”- suv xo‘jaligi vaziri

{Yii::t(}

O'tkazib yuborish 6s

O'tkazib yuborish

Kun.uz muxbiriga ko‘ra, vazir tadbir davomida O‘zbekistonning suv inshootlari xavfsizligi borasidagi savolga ham javob berdi.

“Ukrainadagi “Kaxovka” GES portlatilishi yana bir bor ko‘rsatdiki, suv inshootlari xavfsizligiga katta e’tibor berish kerak. Ularning har biri bilan favqulodda vaziyatlar sodir bo‘lganda qilinadigan ishlar rejasini ishlab chiqish kerak.

Bizda ham barcha GESlarimiz uchun ular portlatilgan taqdirda qilinadigan ishlar loyihasi mavjud. Bunda Favqulodda vaziyatlar vazirligi nima qilishi, Suv xo‘jaligi vazirligi, “O‘zbekgidroenergo” nima qilishi to‘liq belgilangan.

Xohlagan GESni tanlang, bizni sizni o‘sha yerga olib boramiz va rejalar bilan tanishtiramiz. Biz yaqinda shu bo‘yicha amaliyot ham qilib ko‘rdik. Bunda “Chorvoq” GES portladi, deb tasavvur qildik-da, suv necha soatda bizga yetib kelishi, biz qayerga borib dislokatsiya qilishimiz-u, qayerda “palatka” qilib, suvni qanday boshqarishni mashq qildik.

Bunday amaliyot hamma suv omborlari bo‘yicha bor”, – dedi vazir.

Shavkat Hamroyev shuningdek, bunday reja Sardoba falokati vaqtida yo‘qmidi, degan savolga ham javob berdi.

Sardoba suv omboridagi qurilish hali tugamagan edi. Bu birinchidan, ikkinchidan, bu loyiha bor edi. Keyin eng katta masala, o‘sha loyihada Sardoba suv ombori uchun 27 mlrd so‘mlik o‘zgarishlarni nazorat qiluvchi qurilmalar o‘rnatish rejasi bor edi. Ammo o‘sha loyihani moliyalash oxirigacha bormagan edi. O‘sha loyiha moliyalanganda suv chiqishni boshlashi bilan sirenalar chalinardi. Bu tizim oxiriga yetmagandi. Sardoba fojiasining eng katta sabablaridan biri – qurilish oxiriga yetmagandi.

Ish komissiyasi ham, davlat komissiyasi ham ko‘rmagan edi. Biz uni tezroq foyda bersin, xalq – jizzaxliklar, sirdaryoliklar qiynalgan, deb uni to‘ldirib ishlatishni boshlagandik. Geologiyasi pand berdi”, – dedi O‘zbekiston suv xo‘jaligi vaziri Shavkat Hamroyev.