Qashqadaryoda elektr tarmoqlari korxonasi xodimi tok urishi oqibatida halok bo‘ldi

“Hududiy elektr tarmoqlari” AJ matbuot xizmatining ma’lum qilishicha, 2022 yil 5 oktabr kuni “Qashqadaryo hududiy elektr tarmoqlari” AJ tarkibidagi G‘uzor tumani elektr tarmoqlari korxonasi tezkor chiqish brigadasi tomonidan 110/35/10 kVli “G‘armiston” nimstansiyasidan chiquvchi 10 kVli “G‘uzor-Sovbog‘” fiderining “Mikop” shoxobchasi avariyadan so‘ng ko‘rikdan o‘tkazilgan. Shundan so‘ng, soat 14:30 atrofida fiderga kuchlanish berilgan.

Biroq tezkor brigada xodimlari o‘zboshimchalik bilan mavjud qoidalarni buzgan holda, naryaddan tashqari 110/10 kVli “G‘uzor” nimstansiyasidan chiquvchi 10 kVli “Oxunboboyev” fiderining 36-tayanchidan iste’molchi balansida bo‘lgan tayanchga o‘tadigan simlarni yechishga uringan vaqtda elektromontyor G‘.B. kuchlanish ostiga tushgan.

Tezkor brigada tomonidan jabrlangan elektromontyor tayanchdan tushirib olinib, unga birinchi yordam ko‘rsatilgan hamda tez yordamga xabar berilgan. Yetib kelgan tez yordam shifokorlari kuchlanish ostiga tushgan elektromontyorni ko‘rikdan o‘tkazganda, uning vafot etgani ayon bo‘lgan.

Qayd etilishicha, mazkur holat yuzasidan kuni kecha “Hududiy elektr tarmoqlari” AJ rahbariyati tomonidan ishchi guruh tuzilib, ayni paytda Qashqadaryo viloyatida mazkur hodisaning sabablari atroflicha o‘rganilmoqda.