Qashqadaryoda fermer norozilik sifatida hokimiyat oldiga chorva mollarini haydab keldi

Ijtimoiy tarmoqlarda Qashqadaryo viloyati G‘uzor tumanida yashovchi fermer norozilik sifatida tuman hokimligi binosi oldiga chorva mollarini haydab kelgani haqida xabarlar tarqaldi.

Xabarlarda, fermer xorijdan zotdor mol olib kelganini, yetarlicha yer ajratilmagani uchun mollari och qolgani, mas’ullar esa uning murojaatlariga e’tibor berishmayotgani uchun shunday yo‘l tutishga majbur bo‘lganini aytgan.

Viloyat IIB axborot xizmati hodisa yuzasidan munosabat bildirdi.

Unda aytilishicha, hodisa 2023 yil 27 fevral kuni sodir bo‘lgan. Fuqaro J.P. akasiga tegishli chorva mollarini G‘uzor tuman hokimligi ma’muriy binosi oldiga haydab kelgan.

«Fuqaroning xatti-harakati yuzasidan G‘uzor tuman IIB tomonidan tergovga qadar surishtiruv harakatlari olib borildi. Fuqaro jamoat joyida yurish-turish qoidalarini qasddan mensimasdan qilgan mazkur xatti-harakatlari bilan  MJtKning 183-moddasida nazarda tutilgan huquqbuzarlikni sodir etgan», deyiladi munosabatda.

Qayd etilishicha, mazkur huquqbuzarlik yuzasidan to‘plangan hujjatlar Jinoyat ishlari bo‘yicha Qamashi tuman sudiga yuborilgan.

Sudning 2023 yil 3 martdagi qaroriga ko‘ra huquqbuzar J.P.ga yetti sutka ma’muriy qamoq jazosi tayinlangan.

Eslatib o‘tamiz, 2022 yil 3 oktyabr kuni G‘uzor tumanidagi “G‘uzor quduq chorva” fermer xo‘jaligi raisi Hamza Toshtemirov chorva fermer xo‘jaligida yer maydoni mavjud emasligi va ozuqa mahsulotlari yetishmovchiligi tufayli “Xalq banki” G‘uzor tumani filiali binosi oldiga chorva mollarini haydab borgan. O‘shanda unga sud qarori bilan BHMning ikki barobari miqdorida jarima tayinlangandi.