Tug‘ish yoshidagi ayollar va homiladorlar yagona elektron bazasi ishlab chiqiladi

“Onalar va chaqaloqlar salomatligini muhofaza qilish hamda aholi reproduktiv salomatligini yanada mustahkamlash chora-tadbirlar to‘g‘risida”gi prezident qarori loyihasi e’lon qilindi.

Sog‘liqni saqlash vazirligi Axborot texnologiyalari va kommunikatsiyalarini rivojlantirish vazirligi bilan birgalikda tug‘ish yoshidagi ayollar va homiladorlar yagona elektron bazasi bo‘yicha axborot tizimi ishlab chiqilishini va 2023 yil 1 yanvarga qadar foydalanishga topshirilishini ta’minlaydi.

Sog‘liqni saqlash vaziri:

O‘zbekistonda onalar va chaqaloqlar hamda aholi reproduktiv salomatligini muhofaza qilish tizimi trasformatsiyalash konsepsiyasi loyihasini ishlab chiqib Vazirlar Mahkamasiga kiritish;

barcha tug‘uruq muassasalari rahbarlarini aholidan tushayotgan shikoyatlar, ko‘rsatilayotgan tibbiy xizmat sifati, moliyaviy kamchiliklarga yo‘l qo‘yilmagani hamda mutaxassislar bilim va amaliy ko‘nikmalari asosida baholash orqali tug‘uruq muassasalari rahbarlari tarkibini professional bilim darajasiga ega bo‘lgan, malakali mutaxassislardan shakllantirish chorasini ko‘radi.

Bunda, rahbar xodimlar bir lavozimda 5 yildan ortiq bo‘lmagan muddat ishlashi hamda rotatsiya amaliyotini keng joriy etish ko‘rsatib o‘tiladi.

Respublika ixtisoslashtirilgan akusherlik-ginekologiya va reproduktologiya ilmiy-amaliy tibbiyot markazi va barcha tug‘uruq muassasalarida davlat tomonidan kafolatlangan bepul tibbiy xizmat turlaridan tashqari xizmatlarni hamda davlat budjetidan saqlanadigan shifo o‘rinlaridan boshqalarni pulli asosda tashkil etishga ruxsat beriladi.