Mulkka taqiq qo‘yilgani to‘g‘risidagi ma’lumotlar banki joriy etiladi

Hukumat qarori bilan boshqa shaxsga o‘tkazish taqiqlab yoki xatlab qo‘yilgan mol-mulklar elektron ma’lumotlar bankini shakllantirish, yuritish va undan foydalanish to‘g‘risidagi nizom tasdiqlandi.

1 oktyabrdan “Notarius” avtomatlashtirilgan axborot tizimida mol-mulkni boshqa shaxsga o‘tkazish taqiqlab (xatlab) qo‘yilgani, taqiqlab (xatlab) qo‘yish bekor qilingani to‘g‘risidagi elektron ma’lumotlar banki joriy etiladi.

Elektron ma’lumotlar bankiga kiritishda:

• jismoniy shaxsga oid va avtomototransport vositalariga oid ma’lumotlar – IIV;
• yuridik shaxsga oid ma’lumotlar – Adliya vazirligi;
• ko‘chmas mulkka oid ma’lumotlar – Kadastr agentligi;
• qishloq xo‘jaligi, melioratsiya va yo‘l-qurilish texnikalariga oid ma’lumotlar – Agrosanoat majmui inspeksiyasi;
• attraksionlar va ko‘tarish inshootlari (minora kranlari)ga oid ma’lumotlar – Sanoat xavfsizligi qo‘mitasi;
• kemalarga oid ma’lumotlar – Transport vazirligi;
• kichik hajmli kemalarga oid ma’lumotlar – FVV Kichik hajmli kemalar inspeksiyasi elektron axborot tizimlari orqali real vaqt rejimida amalga oshiriladi.

Elektron ma’lumotlar banki davlat tilida shakllantiriladi va yuritiladi. Notarius elektron ma’lumotlar banki orqali mol-mulkni boshqa shaxsga o‘tkazishni taqiqlab qo‘yishi va taqiqni bekor qilishi mumkin.

Mol-mulkni boshqa shaxsga o‘tkazishni taqiqlab yoki xatlab qo‘yish, uni bekor qilishda to‘lov undirilmaydi. Murojaatga asosan elektron ma’lumotlar bankida mavjud ma’lumotlar notarius va (yoki) notarial arxiv mudiri tomonidan to‘g‘ridan to‘g‘ri yoki YaIDXP orqali yoxud E-notarius.uz axborot portali orqali taqdim etiladi.