Litva temiryo‘llari Kaliningradga sanksiya ostidagi tovarlar tranzitini tikladi

Litva temiryo‘llari (LTG Cargo) avvalroq YeI sanksiyalar ro‘yxatiga kiritilgan yuklarning Kaliningrad viloyatiga tranzitini tikladi. Bu haqda 22 iyul, juma kuni LRT Litva milliy radio va televideniyesi efirida LTG Cargo kompaniyasi vakili Mantas Dubauskas ma’lum qildi.

Uning so‘zlariga ko‘ra, xaridorlar allaqachon xabardor qilingan. Dubauskasning qo‘shimcha qilishicha, bunday yuklarni tashish uchun kodlar tekshiriladi va nazorat tizimiga kiritiladi. 

«Biz tushuntirishlar oldik», dedi LTG Cargo vakili. Yevrokomissiya 20 iyul kuni vaziyatga oydinlik kiritdi: sanksiya ostidagi yuklarning temiryo‘l orqali tranzitiga ruxsat berilgan, avtotransportda esa taqiqlanganligicha qolmoqda. 

Mintaqa hukumati matbuot xizmati rahbari Dmitriy Liskov, o‘z navbatida, yaqin kunlarda Kaliningrad oblastiga 60 vagon sement jo‘natilishini aytdi.
Litvada 11 iyul kuni Yevroittifoqqa sement, spirt va Rossiyada ishlab chiqariluvchi boshqa qator tovarlarni olib kirishga taqiq kuchga kirdi. Cheklovlar, shuningdek, yog‘och va sanoat kimyoviy moddalariga ham tegishli. 

Litva Tashqi ishlar vazirligi Kaliningrad oblasti va RFning boshqa hududlari o‘rtasida quruqlikdagi tranzit to‘xtatilmagani yoki to‘sib qo‘yilmaganini ta’kidladi. «YeI sanksiyalariga taalluqli bo‘lmagan yo‘lovchilar va yuklarning tranziti davom etmoqda. Litva ushbu tranzitga hech qanday bir tomonlama, individual yoki qo‘shimcha cheklovlar kiritmagan», - deyiladi TIV xabarida. 

YeI sanksiyalarining to‘rtinchi to‘plami Rossiyaning Ukrainaga qarshi harbiy tajovuziga javob tariqasida mart oyida kiritilgan edi.