Qashqadaryoda 2019–2020 yillarda 562 nafar mansabdor korrupsion jinoyat sodir etgani uchun jinoiy javobgarlikka tortilgani ma'lum qilindi

Qashqadaryo viloyatida 2019–2020 yillarda 562 nafar mansabdor shaxs korrupsion jinoyat sodir etgani uchun jinoiy javobgarlikka tortilgan. Ularning 18 nafari viloyat va 544 nafari tuman darajasidagi davlat idoralari mansabdor shaxslari bo‘lgan. Bu haqda viloyat Korrupsiyaga qarshi kurashish Kengashining navbatdagi yig‘ilishida ma'lum qilingan.

Ma'lum qilinishicha, joriy yil 15 oktabr kuni Qashqadaryo viloyati Korrupsiyaga qarshi kurashish Kengashining navbatdagi yig‘ilishi bo‘lib o‘tgan. Yig‘ilishda korrupsion holatlarning oldini olishda keng jamoatchilikning o‘rni beqiyos ekani ta'kidlangan.

Korrupsiyaga qarshi kurash bo‘yicha ko‘rilayotgan tizimli choralarga qaramasdan, budjet mablag‘laridan foydalanish, davlat xaridlari, kapital qurilish, litsenziya va ruxsatnomalarni olish, bank kreditlarini ajratish, ishga qabul qilish kabi yo‘nalishlarda korrupsiya holatlari saqlanib qolayotgani ma'lum qilingan.

Qayd etilishicha, Qashqadaryo viloyatida 2019–2020 yillar davomida jami 562 nafar turli darajadagi mansabdor shaxs korrupsion jinoyat sodir etgani uchun jinoiy javobgarlikka tortilgan. Ularning 18 nafari viloyat va 544 nafari tuman darajasidagi davlat idoralari mansabdor shaxslari bo‘lgan.

Masalan, Koson tumani hokimining o‘rinbosari A.X. tadbirkorlik faoliyatini tashkil etmagan 6 nafar yaqin qarindoshlari, jumladan kelini M.T., qudasi O.K., haydovchisining turmush o‘rtog‘i S.S., uning singlisi A.S. nomiga 180 million so‘m kredit mablag‘lari ajratilishiga erishib, ushbu mablag‘larni naqdlashtirgan holda talon-toroj qilib yuborgan.

Shuningdek, Qashqadaryo viloyatida budjet buyurtmachilari tomonidan «dxarid.uz» maxsus axborot portaliga joylashtirilgan davlat xaridlariga oid may-iyul oylaridagi e'lonlar masofaviy monitoring qilinganda qator qonunbuzilish holatlari aniqlangan. Jumladan, qiymati 12,5 milliard so‘mlik 41 ta tanlov e'lonida «Davlat xaridlari to‘g‘risida»gi va «Raqobat to‘g‘risida»gi Qonunlarning talablari buzilgan.

Yig‘ilish yakunida bu kabi holatlarning oldini olish bo‘yicha manzilli reja tuzilib, keng jamoatchilikni jalb etgan holda ishlarni tashkil etishga kelishib olingan.