Rossiyada O‘zbekiston fuqarosi halok bo‘ldi

O‘zbekistonning Yekaterinburg shahridagi Bosh konsulxonasi bergan ma'lumotga ko‘ra, 2019 yilning 26 iyul kuni Chelyabinsk shahrida O‘zbekiston fuqarosi B.R.ni yo‘lni kesib o‘tayotganida yuk avtomashinasi urib ketdi va u voqea joyida vafot etdi.

TIV xabarida aytilishicha, Bosh konsulxonasi vaziyatni nazoratga oldi va O‘zbekiston Bandlik va mehnat munosabatlari vazirligi huzuridagi Tashqi mehnat migratsiyasi masalalari agentligining Moskva shahridagi vakolatxonasi hamda Chelyabinsk shahridagi o‘zbek diasporasi bilan birgalikda marhumning jasadini vatanga jo‘natish bilan bog‘liq tashkiliy va boshqa masalalarni hal qilyapti.

Konsullik-huquqiy departamenti marhumning oila a'zolari va yaqinlariga hamdardlik izhor etgan hamda Rossiyaning Ural federal okrugi (Kurgan oblasti, Sverdlovsk oblasti, Tyumen oblasti, Chelyabinsk oblasti, Xanti-Mansiysk avtonom okrugi – Yugra, Yamal-Nenetsk avtonom okrugi) hududida bo‘lib turgan O‘zbekiston fuqarolariga ular zarurat tug‘ilgan holatlarda mamlakatning Yekaterinburg shahridagi Bosh konsulxonasiga quyidagi telefon raqamlari orqali murojaat qilishlari mumkinligini eslatib o‘tgan: +7 343 276 31 66, +7 343 272 31 33.