Xorijiy davlatlar avtomobillarining O‘zbekistonga kirganligi uchun yig‘imlarni undirish tartibi to‘g‘risidagi nizomga o‘zgartirish kiritiladi

Normativ-huquqiy hujjatlar loyihalari muhokamasi portalida “Xorijiy davlatlar avtotransport vositalarining O‘zbekiston Respublikasi hududiga kirganligi hamda tranzit o‘tishi uchun yig‘imlarni undirish tartibi to‘g‘risidagi nizomga o‘zgartirish va qo‘shimcha kiritish haqida”gi hujjat loyihasi joylashtirildi.

Xorijiy davlatlar avtotransport vositalarining O‘zbekiston Respublikasi hududiga kirganligi hamda tranzit o‘tishi uchun yig‘imlarni undirish tartibi to‘g‘risidagi nizomga kiritilayotgan o‘zgartirish va qo‘shimcha
 
1-band quyidagi tahrirda bayon etiladi:

“5. Maxsus kassalar ishini tashkil etish, inkassatsiya va qimmatliklarni tashish, mazkur Nizomda boshqacha qoida nazarda tutilmagan bo‘lsa, “Tijorat banklarida kassa ishini tashkil etish, naqd pul va boshqa qimmatliklarni inkassatsiya qilishga doir” yo‘riqnoma (ro‘yxat raqami 3028, 2018 yil 29 iyun) talablariga muvofiq amalga oshiriladi.”.

11-band quyidagi xatboshisi bilan to‘ldiriladi:

“Bank plastik kartalar orqali yig‘imlar undirilganda to‘lov terminali kvitansiyasi (slip)ning bir qismi ma'lumotnomaga, ikkinchi qismi kvitansiya bilan birga mijozga taqdim qilinadi.”.

Eslatib o‘tamiz, avvalroq O‘zbekiston o‘z hududi orqali yuklar tranzitini soddalashtirgani xabar qilingandi.