Ayrim sanoat mahsulotlari uchun “Karbon yig‘imi” tizimi joriy etiladi

2025 yilga mo‘ljallangan davlat dasturi loyihasi muhokama uchun e’lon qilindi.

Unga ko‘ra, ayrim mahsulotlarni ishlab chiqarish va realizatsiya qilish uchun kompensatsiya to‘lov (yig‘im)ini joriy etish bo‘yicha takliflar tayyorlanadi.

Bunda uglerod izi yuqori bo‘lgan sanoat mahsulotlari (sement, ko‘mir, siqilgan gaz va boshqalar) uchun “Karbon yig‘imi” tizimini joriy etish va ulardan kelib tushadigan mablag‘larni hududlarda ekologiya muammolarini hal etishga yo‘naltirish masalalari bo‘yicha takliflar tayyorlash nazarda tutiladi.

Investorlarni jalb qilgan holda yirik korxonalar tomonidan import o‘rnini bosuvchi sanoat mahsulotlarini ishlab chiqarishni kengaytirish rejalashtirilmoqda.

Import qilinayotgan sanoat mahsulotlarini tahlil qilish, mahalliylashtirish va import o‘rnini bosuvchi mahsulotlarni ishlab chiqarish ko‘zda tutilgan. 

Bunda:

• import hajmi yuqori bo‘lgan sanoat mahsulotlarini tahlil qilish va ularni mahalliylashtirish bo‘yicha chora tadbirlarni belgilash;
• import o‘rnini bosuvchi mahsulotlar ishlab chiqarish bo‘yicha investitsiya loyihalari bo‘yicha takliflarni ishlab chiqish hamda investorlarni jalb qilish choralarini ko‘rish;
• sanoatning “drayver” sohalarini rivojlantirish maqsadida yirik korxonalar tomonidan import o‘rnini bosuvchi sanoat mahsulotlarni ishlab chiqarishni yo‘lga qo‘yish mo‘ljallangan.