O‘zbekiston va Yaponiya kadrlar tayyorlashda hamkorlikni rivojlantirish bo‘yicha kelishuv imzoladi

2018 yil 10 avgust kuni Oliy va o‘rta maxsus ta'lim vazirligida Yaponiya Xalqaro hamkorlik agentligi (Japan International Cooperation Agency – JICA) vakillaridan iborat delegatsiya rasmiy qabul qilindi. 

Uchrashuvda Yaponiya Xalqaro hamkorlik agentligining O‘zbekistondagi vakolatxonasi rahbari Muneo Takasaka hamda oliy va o‘rta maxsus ta'lim vaziri Inom Majidov tomonidan jami 262 mln. yapon iyenasi (2,3 mln dan ortiq AQSh dollari) miqdorida grant kelishuvi imzolandi, deb xabar bermoqda Oliy va o‘rta-maxsus ta'lim vazirligi matbuot xizmati.

Oliy va o‘rta maxsus ta'lim vazirligi hamda JICA o‘rtasida imzolangan grant kelishuviga muvofiq Yaponiya hukumatining beg‘araz yordam dasturidagi “Kadrlar tayyorlash uchun stipendiyalar ajratish” (Japanese Grant Aid for Human Resource Development Scholarship – JDS) loyihasi doirasida vazirlik va idoralar, tadqiqot muassasalari hamda davlat kompaniyalari xodimlarining o‘qishi tashkil etiladi. 

Bunda magistratura va doktorantura dasturlari bo‘yicha iqtisod infrastrukturalarini takomillashtirish, biznes sohasi, qonunchilik tizimi, davlat mablag‘lari, qishloq xo‘jaligi va suv resurslari, aholi salomatligini saqlashni boshqarish yo‘nalishlarida tanlab olingan nomzodlar 2019-2022 yillarda ta'lim olish uchun Yaponiyaning nufuzli oliy o‘quv yurtlariga yuboriladi. 

JDS loyihasining asosiy maqsadi O‘zbekiston Respublikasiga inson resurslarini rivojlantirishga ko‘maklashish hamda yosh davlat xizmatchilari uchun Yaponiyaning ilg‘or o‘quv yurtlarida magistratura yo‘nalishi bo‘yicha tahsil olish imkonini yaratishdan iborat. O‘tgan davr mobaynida jami 300 nafardan ortiq o‘zbekistonlik davlat xizmatchilari ushbu stipendiyaga sazovor bo‘lishgan.