Qashqadaryoda bosqinchilik bilan shug‘ullanib kelgan jinoiy guruh a’zolari qo‘lga olindi

Qashqadaryo viloyatida bosqinchilik sodir etgan jinoiy guruh a’zolari qo‘lga olinib, ularning avval sodir etilgan boshqa bir jinoyatga aloqadorligi aniqlandi. Bu haqda IIV matbuot xizmati xabar berdi.

Qayd etilishicha, Qarshi tumani Alisher Navoiy mahallasida xonadonlarning biriga soat 04:00 larda niqob kiygan uch nafar shaxs devor orqali kirgan. Ular xonadon egasi, uning turmush o‘rtog‘i va o‘g‘liga tan jarohati yetkazgan.

Jinoiy guruh ulardan pul talab qilib, uydagi shkafda bo‘lgan tilla taqinchoqlarni olib chiqib ketgan.

«Eshik ochilganini sezdim. Parda qimirlab, fonar yorug‘ini ko‘rganimdan keyin uyg‘ondim. Eshikka yurib borganimda, ichkariga niqob kiygan bir kishi bostirib kirdi va og‘zimni berkitdi», — deydi jabrlanuvchi ayol.

Holat yuzasidan Jinoyat kodeksining 164-moddasi (bosqinchilik) bilan jinoyat ishi qo‘zg‘atilgan. Olib borilgan tezkor harakatlar natijasida gumonlanuvchilar davlat raqamisiz Nexia-2 mashinasida hodisa joyida harakatlangani ma’lum bo‘lgan.

Gumonlanuvchilar shaxsiga aniqlik kiritilib, ulardan biri qo‘lga olingan. Shuningdek, bosqinchilik jinoyatini sodir etishda jabrlanuvchi to‘g‘risida ma’lumot bergan shaxs ham ushlangan. O‘rganishlar davomida ushbu guruh 2024 yil 26 noyabr kuni Qarshi tumanida sodir etilgan yana bir bosqinchilik jinoyatiga ham aloqador ekani ma’lum bo‘lgan.

Jinoyatda ishtirok etgan, Qarshi shahrida yashovchi 40 yoshli fuqaro ham qo‘lga olingan.