Cadillac 4 yil ichida 8 ta yangi model ishlab chiqarmoqchi

Cadillac avtomobilsozlik kompaniyasi 2021 yilgacha kamida 8 ta yangi model ishlab chiqarmoqchi. Bu modellardan to‘rttasi krossover bo‘ladi. Bu haqda Automobile nashri xabar bermoqda. 

Dastlabki ma'lumotlarga ko‘ra, ilk ikkita yangi model keyingi yildayoq paydo bo‘ladi.  Bu kichik sedan va krossover bo‘ladi. Sedan ATS modelining o‘rnini egallaydi va bozorda Mercedes-Benz CLA bilan raqobat qiladi. Bu mashina old privodli, oxirgi avloddagi Chevrolet Cruze shassisida quriladi.   

Ixcham krossover XT3 indeksi oladi hamda General Motors konsernining orqa privodli uzaytirilgan Alpha shassisi negizida quriladi va BMW X3’ga raqobatchi bo‘ladi.

2019 yilda CTS modelining o‘rnini egallaydigan model va katta o‘lchamdagi XT7 krossoveri chiqadi. Krossover BMW’ning eng katta modeli X7’ga raqobat tashkil qiladi. BMW X7 modeli 2018-2019 yillarda paydo bo‘lishi kutilmoqda. 

2020 yilda "Kadillak"ning eng ixcham krossoveri chiqadi va u gabarit o‘lchamlari bo‘yicha BMW X1 modeliga yaqin bo‘ladi. Yana bir yildan keyin bozorga ikkinchi avloddagi XT5 va yangi katta flagman sedan CT8 chiqadi.