AQShning Sietl shahrida Toshkent sharafiga nomlangan bog‘ restavratsiyadan so‘ng qaytadan ochildi

AQShning Sietl shahridagi Kapitoliy tepaligida joylashgan «Toshkent» bog‘ining restavratsiyadan so‘ng qaytadan ochilish marosimi bo‘lib o‘tdi. «Jahon» AA xabariga ko‘ra, bu bog‘ O‘zbekistonning AQShdagi elchixonasi tomonidan «Sietl–Toshkent» birodar shaharlar uyushmasi ko‘magida tashkil etilgan.

Ochilish tadbirida Sietl ma'muriyati hamda birodar shaharlar uyushmasi rahbariyati, Vashington shtati universiteti va shahar aholisi vakillari qatnashgan. Tadbir O‘zbekistonning birinchi prezidenti Islom Karimov xotirasiga sukut daqiqasi bilan boshlangan.

O‘z chiqishida «Sietl–Toshkent» birodar shaharlar uyushmasi raisi S. Pekston tadbir mezbonlari va ishtirokchilari nomidan Islom Karimovning vafoti munosabati bilan O‘zbekiston xalqiga hamdardlik bildirgan. Pekston xonim birinchi prezidentning mamlakat suverenitetini mustahkamlashda va siyosiy-iqtisodiy yo‘nalishini shakllantirishda, shuningdek, Markaziy Osiyoda tinchlik va barqarorlikni ta'minlashda tutgan muhim o‘rnini ta'kidlab o‘tgan.

Uyushma rahbari bog‘ning tarixiy ahamiyati haqida gapira turib, uning tashqi ko‘rinishini yaxshilash bo‘yicha ko‘rilayotgan choralarga to‘xtalib o‘tgan. Xususan, u restavratsiya natijasida bog‘ning yo‘l infrastrukturasi yangilangani va obodonlashtirish ishlari yakunlanganini ta'kidlagan.

Pekston xonim uyushmaning o‘zbekistonlik sheriklar bilan muloqotni mustahkamlab borish, shuningdek, O‘zbekiston bilan konstruktiv ruhdagi hamkorlikni davom ettirish niyatini izhor etgan va «Sietl–Toshkent» yo‘nalishida O‘zbekiston bilan yo‘lga qo‘yilgan hamkorlikni yuqori baholagan.

O‘z navbatida, Sietl shahri meri o‘rinbosari X. Kim ikki davlat o‘rtasidagi aloqalarni mustahkamlash yo‘lida olib borilayotgan ishlarga to‘xtalib o‘tgan.

«Shahrimizdagi «Toshkent» bog‘i nafaqat sheriklik munosabatlarining tarixiy bosqichi ramzi, balki ikki davlat va xalq munosabatlarining samarador hamkorligi natijasi hamdir», — deya ta'kidlagan Kim xonim.

Ochilish marosimida Sietlning sobiq meri U. Ulman hamda Vashington shtati universiteti professori I. Sirtautas ham chiqish qilgan.

Marosim ishtirokchilariga O‘zbekistonda turli sohalarda ro‘y berayotgan keng ko‘lamli o‘zgarishlar to‘g‘risida batafsil ma'lumotlar berilgan.

Bog‘ni restavratsiya qilish bo‘yicha loyihaning bosh maqsadi sersoya daraxtlar yordamida bog‘ manzarasini yaxshilash edi. Unda  Life, Love, Time and Game yodgorligi atrofiga qo‘shimcha maydon qurilgan va o‘rindiqlar o‘rnatilgan.

Bog‘ 1980 yillar oxirida barpo etilgan va Sietlga qardosh bo‘lgan Toshkent shahri sharafiga nomlangan edi. Shaharlarni qardosh qilish to‘g‘risidagi bitim 1973 yilda imzolangan.