Россия Европанинг 15 та ОАВ сайтларига киришни чеклади

Россия Европа Иттифоқи санкцияларига жавобан ўз ҳудудига ЕИнинг 15 та оммавий ахборот воситасига киришни чеклаб қўйди. Бу ҳақда РФ ТИВ маълум қилди. Идора кириш чекланган ресурслар рўйхатини келтирмади.

«Расмий Брюссел ва ЕИга аъзо давлатларнинг пойтахтлари бир неча бор Россия ОАВга қарши йўналтирилган тақиқлар ҳамда асоссиз чекловлар, шунингдек, сиёсий сабаблар билан қўлланган бошқа репрессия шакллари РФ томонидан тегишли жавобсиз қолмаслиги тўғрисида огоҳлантирилган эди», - дейилади ТИВ баёнотида.

Ушбу чоралар Eurasia Daily, Fondsk, Lenta, News Front, Rubaltic, South Front, Стратегик маданият фонди, «Красная звезда»га қарши санкцияларга жавобан қабул қилинган. Юқорида номлари санаб ўтилган ОАВга қарши чекловлар ЕИ томонидан феврал ойида Россияга қарши қабул қилинган санкцияларнинг 16-пакетидан ўрин олган эди.

Аввалроқ Европа Иттифоқи кенгаши Россияга қарши иқтисодий санкцияларни 2026 йил 31 январга қадар узайтиргани тўғрисида хабар берилганди. Ушбу санкциялар савдо, молия, энергетика, технология ва икки мақсадли товарларни, шунингдек, саноат, транспорт ва ҳашаматли буюмларни чеклашни ўз ичига олади.

Ҳозирда ЕИ Россияга қарши санкцияларнинг 18-пакетини муҳокама қилмоқда. 26 июн куни Брюсселда ўтказилган саммитда Словакия қарши чиққани боис уни тасдиқлаб бўлмади.